shajar shajar nigaran hai kali kali bedar

shajar shajar nigarāñ hai kalī kalī bedār

na jaane kis kī nigāhoñ ko DhūñDtī hai bahār

kabhī fuġhāñ bhī nashāt-o-tarab kā afsāna

kabhī hañsī bhī taḌapte hue diloñ kī pukār

na jaane kis kī nashāt-e-qadam se haiñ mahrūm

ki ek umr se suune paḌe haiñ rāhguzār

hazār haar kisī chashm-e-āshnā ke tufail

ujaḌ ujaḌ ke base haiñ mohabbatoñ ke dayār

ajiib haal hai betābī-e-mohabbat kā

shab-e-visāl kī rāhat meñ DhūñDtī hai qarār

ye barq-e-husn aur us par ye terī ḳhū-e-hijāb

ye sail-e-ishq aur is par nazar nazar kā shumār

hai in kī pursish-e-dard-o-alam meñ bhī pinhāñ

vo ik kasak ki samajhte nahīñ jise ġham-ḳhvār

shajar shajar nigaran hai kali kali bedar

na jaane kis ki nigahon ko DhunDti hai bahaar

kabhi fughan bhi nashat-o-tarab ka afsana

kabhi hansi bhi taDapte hue dilon ki pukar

na jaane kis ki nashat-e-qadam se hain mahrum

ki ek umr se sune paDe hain rahguzar

hazar haar kisi chashm-e-ashna ke tufail

ujaD ujaD ke base hain mohabbaton ke dayar

ajib haal hai betabi-e-mohabbat ka

shab-e-visal ki rahat mein DhunDti hai qarar

ye barq-e-husn aur us par ye teri KHu-e-hijab

ye sail-e-ishq aur is par nazar nazar ka shumar

hai in ki pursish-e-dard-o-alam mein bhi pinhan

wo ek kasak ki samajhte nahin jise gham-KHwar