sham-e-iKHlas-o-yaqin dil mein jala kar chaliye

sham-e-iḳhlās-o-yaqīñ dil meñ jalā kar chaliye

zulmat-e-yās meñ ummīd jagā kar chaliye

ham se dīvāne kahāñ zād-e-safar rakhte haiñ

saath chalnā hai to asbāb luTā kar chaliye

ishq kā rāsta āsān nahīñ hotā hai

bāzī-e-ishq meñ jaan apnī luTā kar chaliye

raat añdherī ho to jugnū kī chamak kaafī hai

shart itnī hai ki ehsās jagā kar chaliye

nafrat o buġhz kā anjām burā hotā hai

nafrat o buġhz se dāman ko bachā kar chaliye

raat saffāk hai sūraj ko nigal jaatī hai

apnī muTThī meñ sitāroñ ko chhupā kar chaliye

haath ko haath sujhā.ī nahīñ detā hai 'ashok'

ab charāġhoñ kī jagah dil ko jalā kar chaliye

sham-e-iKHlas-o-yaqin dil mein jala kar chaliye

zulmat-e-yas mein ummid jaga kar chaliye

hum se diwane kahan zad-e-safar rakhte hain

sath chalna hai to asbab luTa kar chaliye

ishq ka rasta aasan nahin hota hai

bazi-e-ishq mein jaan apni luTa kar chaliye

raat andheri ho to jugnu ki chamak kafi hai

shart itni hai ki ehsas jaga kar chaliye

nafrat o bughz ka anjam bura hota hai

nafrat o bughz se daman ko bacha kar chaliye

raat saffak hai suraj ko nigal jati hai

apni muTThi mein sitaron ko chhupa kar chaliye

hath ko hath sujhai nahin deta hai 'ashok'

ab charaghon ki jagah dil ko jala kar chaliye