shama san shab ke mehman hain hum

sham.a saañ shab ke mehmāñ haiñ ham

sub.h hote to phir kahāñ haiñ ham

tum bin ai raftgān-e-mulk-e-adam

hastī apnī se sargirāñ haiñ ham

bāġhbāñ Tuk to baiThne de kahīñ

aah gum-karda āshiyāñ haiñ ham

dekhte haiñ usī ko ahl-e-nazar

go nihāñ hai vo aur ayaañ haiñ ham

na kisī kī suneñ na apnī kaheñ

naqsh-e-dīvār-e-bostāñ haiñ ham

jins-e-āsūdgī nahīñ ham paas

dard aur ġham ke kārvāñ haiñ ham

dil se naala nikal nahīñ saktā

yaañ talak ġham se nā-tavāñ haiñ ham

kyā kaheñ ham 'hasan' ba-qaul 'ziyā'

jis tarah se ki ab yahāñ haiñ ham

daaġh haiñ kārvān-e-rafta ke

naqsh-e-pā-e-guzishtagāñ haiñ ham

shama san shab ke mehman hain hum

subh hote to phir kahan hain hum

tum bin ai raftgan-e-mulk-e-adam

hasti apni se sargiran hain hum

baghban Tuk to baiThne de kahin

aah gum-karda aashiyan hain hum

dekhte hain usi ko ahl-e-nazar

go nihan hai wo aur ayan hain hum

na kisi ki sunen na apni kahen

naqsh-e-diwar-e-bostan hain hum

jins-e-asudgi nahin hum pas

dard aur gham ke karwan hain hum

dil se nala nikal nahin sakta

yan talak gham se na-tawan hain hum

kya kahen hum 'hasan' ba-qaul 'ziya'

jis tarah se ki ab yahan hain hum

dagh hain karwan-e-rafta ke

naqsh-e-pa-e-guzishtagan hain hum