shamim-e-gul ki tarah nikhat-e-hina ki tarah

shamīm-e-gul kī tarah nik.hat-e-hinā kī tarah

guzar rahe haiñ ḳhayāloñ meñ vo sabā kī tarah

ġhurūr-e-husn kī sūrat mirī anā kī tarah

vo be-niyāz haiñ mujh se mire ḳhudā kī tarah

nava-e-dard hai jibrīl kī sadā kī tarah

dil-e-hazīñ hai mirā vādī-e-hirā kī tarah

havas kā naam na de jazba-e-mohabbat ko

mire ḳhulūs ko rusvā na kar vafā kī tarah

sukūn-e-dil ko mayassar kahāñ sabāt yahāñ

milī ḳhushī bhī vo umr-e-gurez-pā kī tarah

vo ek aah bhī samjhā sharīk-e-dard jise

rukī hai lab pe mire harf-e-mudda.ā kī tarah

adā-e-pursish-e-ahvāl ik fareb sahī

magar vo shoḳh milā dard-āshnā kī tarah

nafas nafas meñ hai ḳhushbū-e-pairahan kis kī

mashām-e-jāñ hai mirā phuul kī qabā kī tarah

rah-e-vafā meñ 'mubārak' ye bebasī merī

maiñ kārvāñ se bichhaḌ kar huuñ naqsh-e-pā kī tarah

shamim-e-gul ki tarah nikhat-e-hina ki tarah

guzar rahe hain KHayalon mein wo saba ki tarah

ghurur-e-husn ki surat meri ana ki tarah

wo be-niyaz hain mujh se mere KHuda ki tarah

nawa-e-dard hai jibril ki sada ki tarah

dil-e-hazin hai mera wadi-e-hira ki tarah

hawas ka nam na de jazba-e-mohabbat ko

mere KHulus ko ruswa na kar wafa ki tarah

sukun-e-dil ko mayassar kahan sabaat yahan

mili KHushi bhi wo umr-e-gurez-pa ki tarah

wo ek aah bhi samjha sharik-e-dard jise

ruki hai lab pe mere harf-e-muddaa ki tarah

ada-e-pursish-e-ahwal ek fareb sahi

magar wo shoKH mila dard-ashna ki tarah

nafas nafas mein hai KHushbu-e-pairahan kis ki

masham-e-jaan hai mera phul ki qaba ki tarah

rah-e-wafa mein 'mubarak' ye bebasi meri

main karwan se bichhaD kar hun naqsh-e-pa ki tarah