shaq aafiyat-kanar kinare ko kar gai

shaq āfiyat-kanār kināre ko kar ga.ī

dariyā kī mauj sar ko paTak kar guzar ga.ī

tohmat kā sail sub.h ko uThne lagā ki shab

dastak thī ek dar pe sadā dar-ba-dar ga.ī

ġhārat-gar-e-sukūñ thiiñ navā-hā-e-ḳhūn-e-balb

jañgal kī shaam shahr meñ aa.ī to Dar ga.ī

rotā phiregā raat ke rastoñ pe māhtāb

āġhosh-e-arz-ḳhāk to sūraj se bhar ga.ī

ārām-e-jāñ thā ḳhvāb-e-sukūñ aañkh jab khulī

sail-e-fanā utar gayā miTTī bikhar ga.ī

nā-karda kāriyoñ kī pashemāniyāñ na pūchh

umr-e-azīz DhūñDte phiriye kidhar ga.ī

tere huzūr kaun sā nazrāna thā qubūl

dil sā guhar bhī le ke mirī chashm-e-tar ga.ī

dīvār-o-dar pe jin ke lahū boltā rahā

mauj-e-fanā vo saare makāñ Dher kar ga.ī

ḳhushbū-e-marg kā na Thikāna milā koī

maiñ bhī ġhubār-e-rāh rahā vo jidhar ga.ī

ab gosh-bar-sadā hue ham dosto to kyā

āvāz duur kī thī samā.at-safar ga.ī

shaq aafiyat-kanar kinare ko kar gai

dariya ki mauj sar ko paTak kar guzar gai

tohmat ka sail subh ko uThne laga ki shab

dastak thi ek dar pe sada dar-ba-dar gai

ghaarat-gar-e-sukun thin nawa-ha-e-KHun-e-balb

jangal ki sham shahr mein aai to Dar gai

rota phirega raat ke raston pe mahtab

aaghosh-e-arz-KHak to suraj se bhar gai

aaram-e-jaan tha KHwab-e-sukun aankh jab khuli

sail-e-fana utar gaya miTTi bikhar gai

na-karda kariyon ki pashemaniyan na puchh

umr-e-aziz DhunDte phiriye kidhar gai

tere huzur kaun sa nazrana tha qubul

dil sa guhar bhi le ke meri chashm-e-tar gai

diwar-o-dar pe jin ke lahu bolta raha

mauj-e-fana wo sare makan Dher kar gai

KHushbu-e-marg ka na Thikana mila koi

main bhi ghubar-e-rah raha wo jidhar gai

ab gosh-bar-sada hue hum dosto to kya

aawaz dur ki thi samaat-safar gai