sharab-e-husn se kuchh aise hum hue maKHmur

sharāb-e-husn se kuchh aise ham hue maḳhmūr

ki hosh tak na thā baaqī kahāñ kā husn-e-shu.ūr

vafā kā ek hī aa.iin ek hī dastūr

dil aadmī kā rahe soz-e-ishq se mā'mūr

kalīm yuuñ bhī sunāo hameñ fasāna-e-tūr

jo tum meñ thā vo nazar aaya tum ko kitnī duur

jo ham nahīñ haiñ to bekār hai ḳhudā kā zuhūr

na is meñ koī ta.allī nā is meñ koī ġhurūr

kashāñ kashāñ yahāñ le aaya merā husn-e-shu.ūr

na merī is meñ ḳhatā hai na merā is meñ qusūr

tirā karam ki mujhe de diyā dil-e-ranjūr

nahīñ to jiine na detā mujhe havas kā shu'ūr

kashākash-e-ġham-e-daurāñ se hai vo kosoñ duur

ki jis ko ġham pe tabassum kā aa gayā hai shu'ūr

hamāre sajde ḳhudā to tumheñ banā na sake

hamārā kufr zamāne meñ ho gayā mash.hūr

mire ḳhudā mirī haq-goī ke vaqār kī ḳhair

vo roz mujh ko sunāte haiñ qissa-e-mansūr

mire gunāh kī tauqīr ai tirī qudrat

ki is siyāhī ne baḳhshā hai kā.enāt ko nuur

taḌap hī dil kī lagī jab to lutf-e-zīst kahāñ

ilāj-e-dard-e-mohabbat hameñ nahīñ manzūr

hazār parde hoñ lekin vo rah nahīñ sakte

mirī nigāh se ojhal mire ḳhayāl se duur

sharab-e-husn se kuchh aise hum hue maKHmur

ki hosh tak na tha baqi kahan ka husn-e-shuur

wafa ka ek hi aain ek hi dastur

dil aadmi ka rahe soz-e-ishq se ma'mur

kalim yun bhi sunao hamein fasana-e-tur

jo tum mein tha wo nazar aaya tum ko kitni dur

jo hum nahin hain to bekar hai KHuda ka zuhur

na is mein koi talli na is mein koi ghurur

kashan kashan yahan le aaya mera husn-e-shuur

na meri is mein KHata hai na mera is mein qusur

tera karam ki mujhe de diya dil-e-ranjur

nahin to jine na deta mujhe hawas ka shu'ur

kashakash-e-gham-e-dauran se hai wo koson dur

ki jis ko gham pe tabassum ka aa gaya hai shu'ur

hamare sajde KHuda to tumhein bana na sake

hamara kufr zamane mein ho gaya mashhur

mere KHuda meri haq-goi ke waqar ki KHair

wo roz mujh ko sunate hain qissa-e-mansur

mere gunah ki tauqir ai teri qudrat

ki is siyahi ne baKHsha hai kaenat ko nur

taDap hi dil ki lagi jab to lutf-e-zist kahan

ilaj-e-dard-e-mohabbat hamein nahin manzur

hazar parde hon lekin wo rah nahin sakte

meri nigah se ojhal mere KHayal se dur