sharab-e-nab ka qatra jo saghar se nikal jae

sharāb-e-nāb kā qatra jo sāġhar se nikal jaa.e

taḌap ke dil mirā qābū-e-dil-bar se nikal jaa.e

ḳhushī meñ kah rahā huuñ aamad aamad hai jo us gul kī

koī kah de ki vīrānī mire ghar se nikal jaa.e

satāte haiñ raqīb aa aa ke maiñ go chhup ke baiThā huuñ

ajab ye zulm hai koī kidhar ghar se nikal jaa.e

agar sun le ki tere saḳht-jāñ kī baarī aa pahuñchī

simaT kar āb-e-ḳhanjar chashm-e-jauhar se nikal jaa.e

nikālo roz ghar se Dar nahīñ lekin ye hai dhaḌkā

ki merā naam hī ik din na daftar se nikal jaa.e

ghaTā ke maiñ ne apnā shauq-e-dil likkhā hai jānāñ ko

ki uḌne meñ na ḳhat aage kabūtar se nikal jaa.e

na jaane kī karo jaldī ki qissa ḳhatm hotā hai

Thahar jaao zarā dam jism-e-lāġhar se nikal jaa.e

qafas meñ daam meñ mere phaḌakne kā ye baa.is hai

havā parvāz karne kī mire par se nikal jaa.e

ijāzat abr ko dar par Thaharne kī nahīñ dete

bas itnā hukm hai aa ke faqat barse nikal jaa.e

'rashīd'-e-soḳhta-dil sar paTakne par hai āmāda

kaho har ik sharar se jald patthar se nikal jaa.e

sharab-e-nab ka qatra jo saghar se nikal jae

taDap ke dil mera qabu-e-dil-bar se nikal jae

KHushi mein kah raha hun aamad aamad hai jo us gul ki

koi kah de ki virani mere ghar se nikal jae

satate hain raqib aa aa ke main go chhup ke baiTha hun

ajab ye zulm hai koi kidhar ghar se nikal jae

agar sun le ki tere saKHt-jaan ki bari aa pahunchi

simaT kar aab-e-KHanjar chashm-e-jauhar se nikal jae

nikalo roz ghar se Dar nahin lekin ye hai dhaDka

ki mera nam hi ek din na daftar se nikal jae

ghaTa ke main ne apna shauq-e-dil likkha hai jaanan ko

ki uDne mein na KHat aage kabutar se nikal jae

na jaane ki karo jaldi ki qissa KHatm hota hai

Thahar jao zara dam jism-e-laghar se nikal jae

qafas mein dam mein mere phaDakne ka ye bais hai

hawa parwaz karne ki mere par se nikal jae

ijazat abr ko dar par Thaharne ki nahin dete

bas itna hukm hai aa ke faqat barse nikal jae

'rashid'-e-soKHta-dil sar paTakne par hai aamada

kaho har ek sharar se jald patthar se nikal jae