shauq baqi nahin baqi nahin ab josh-o-KHarosh

shauq baaqī nahīñ baaqī nahīñ ab josh-o-ḳharosh

din vo pur-kaif the jab ham the sarāsar mad.hosh

maslahat josh-e-baġhāvat ko dabā detī hai

dil dhaḌaktā hai magar dil kī sadā.eñ ḳhāmosh

ab koī sūrat-e-guftār nazar aatī nahīñ

vo bhī ḳhāmosh mirā radd-e-amal bhī ḳhāmosh

terī raftār lagātār ho kachhue kī tarah

varna rah jā.egā tū raah meñ misl-e-ḳhargosh

ziist kī raah pe tanhā na kabhī chal paayā

ġham-e-jānāñ ġham-e-daurāñ bhī rahe dosh-ba-dosh

sāmnā dahr kā tanhā use ab karne de

paañv meñ beTe ke aane lage terī pā-posh

bazm-e-urdu se huī der bahut aa.e hue

ab talak saañs meñ ḳhushbū hai mo.attar haiñ gosh

ab to ghar-bār meñ lagtā hī nahīñ dil 'āzam'

aisā lagtā hai ki ho jā.eñge ham ḳhāna-ba-dosh

shauq baqi nahin baqi nahin ab josh-o-KHarosh

din wo pur-kaif the jab hum the sarasar madhosh

maslahat josh-e-baghawat ko daba deti hai

dil dhaDakta hai magar dil ki sadaen KHamosh

ab koi surat-e-guftar nazar aati nahin

wo bhi KHamosh mera radd-e-amal bhi KHamosh

teri raftar lagatar ho kachhue ki tarah

warna rah jaega tu rah mein misl-e-KHargosh

zist ki rah pe tanha na kabhi chal paya

gham-e-jaanan gham-e-dauran bhi rahe dosh-ba-dosh

samna dahr ka tanha use ab karne de

panw mein beTe ke aane lage teri pa-posh

bazm-e-urdu se hui der bahut aae hue

ab talak sans mein KHushbu hai moattar hain gosh

ab to ghar-bar mein lagta hi nahin dil 'azam'

aisa lagta hai ki ho jaenge hum KHana-ba-dosh