shauq-e-awara yunhi KHak-basar jaega

shauq-e-āvāra yūñhī ḳhāk-basar jā.egā

chāñd chupke se kisī ghar meñ utar jā.egā

us kī sohbat bhī hai ik ḳhvāb-sarā meñ rahnā

vo jo chal degā to ye ḳhvāb bikhar jā.egā

vaqt har zaḳhm kā marham hai pa lāzim to nahīñ

zaḳhm jo us ne diyā hai kabhī bhar jā.egā

jins-e-tāza ke ḳharīdār paḌe haiñ har-sū

kaise be-kār mirā harf-e-hunar jā.egā

soch liije ki ye ayyām guzar jā.eñge

matla-e-fikr bahar-taur nikhar jā.egā

nāḳhudā kashtī meñ sūrāḳh kiye jaatā hai

ham bhī Dūbeñge vahīñ aap jidhar jā.egā

shauq-e-dīdār meñ us sarv-e-ravāñ ke 'shāhid'

mausam-e-gul mire āñgan meñ Thahar jā.egā

shauq-e-awara yunhi KHak-basar jaega

chand chupke se kisi ghar mein utar jaega

us ki sohbat bhi hai ek KHwab-sara mein rahna

wo jo chal dega to ye KHwab bikhar jaega

waqt har zaKHm ka marham hai pa lazim to nahin

zaKHm jo us ne diya hai kabhi bhar jaega

jins-e-taza ke KHaridar paDe hain har-su

kaise be-kar mera harf-e-hunar jaega

soch lije ki ye ayyam guzar jaenge

matla-e-fikr bahar-taur nikhar jaega

naKHuda kashti mein suraKH kiye jata hai

hum bhi Dubenge wahin aap jidhar jaega

shauq-e-didar mein us sarw-e-rawan ke 'shahid'

mausam-e-gul mere aangan mein Thahar jaega