shauq-e-nazar gulab se bhi mutmain nahin

shauq-e-nazar gulāb se bhī mutma.in nahīñ

chashm-e-udās ḳhvāb se bhī mutma.in nahīñ

kis umr meñ na-jāne qanā.at pasand ho

ye dil ki dastiyāb se bhī mutma.in nahīñ

ab tere ḳhadd-o-ḳhāl pe kyā iktifā kare

ye aañkh māhtāb se bhī mutma.in nahīñ

bas yūñhī be-qarārī kī lat meñ huuñ mubtalā

vaise maiñ iztirāb se bhī mutma.in nahīñ

mere bhale dinoñ pe bhī vo mo'tariz rahā

ab sā.at-e-ḳharāb se bhī mutma.in nahīñ

kitnoñ ko rāh-e-rāst pe laayā 'hasan' magar

darvesh is savāb se bhī mutma.in nahīñ

shauq-e-nazar gulab se bhi mutmain nahin

chashm-e-udas KHwab se bhi mutmain nahin

kis umr mein na-jaane qanaat pasand ho

ye dil ki dastiyab se bhi mutmain nahin

ab tere KHadd-o-KHal pe kya iktifa kare

ye aankh mahtab se bhi mutmain nahin

bas yunhi be-qarari ki lat mein hun mubtala

waise main iztirab se bhi mutmain nahin

mere bhale dinon pe bhi wo mo'tariz raha

ab saat-e-KHarab se bhi mutmain nahin

kitnon ko rah-e-rast pe laya 'hasan' magar

darwesh is sawab se bhi mutmain nahin