shauq-e-nazzara jo sargarm-e-nazar hota hai

shauq-e-nazzāra jo sargarm-e-nazar hotā hai

jalva-gar husn ba-andāz-e-digar hotā hai

ho mubārak ye tirī parda-nashīnī tujh ko

yaad ye bhī rahe dīvār meñ dar hotā hai

jhuuT phir jhuuT hai lekin ye haqīqat hai ki jhuuT

purkashish hotā hai aur zūd-asar hotā hai

jis ḳharābe meñ paḌā huuñ use ghar kaise kahūñ

dar-o-dīvār salāmat hoñ to ghar hotā hai

tū hai vo naḳhl gul-afshāñ hai jo har rahrav par

maiñ huuñ vo peḌ jo be-barg-o-samar hotā hai

us kī bedād-garī din ke ujāle meñ kahāñ

bol añdhere kā baḌā tā-ba-sahar hotā hai

vādī-e-yād hai aur pā-e-tasavvur 'ehsāñ'

dekhiye kis tarah maazī kā safar hotā hai

shauq-e-nazzara jo sargarm-e-nazar hota hai

jalwa-gar husn ba-andaz-e-digar hota hai

ho mubarak ye teri parda-nashini tujh ko

yaad ye bhi rahe diwar mein dar hota hai

jhuT phir jhuT hai lekin ye haqiqat hai ki jhuT

purkashish hota hai aur zud-asar hota hai

jis KHarabe mein paDa hun use ghar kaise kahun

dar-o-diwar salamat hon to ghar hota hai

tu hai wo naKHl gul-afshan hai jo har rahraw par

main hun wo peD jo be-barg-o-samar hota hai

us ki bedad-gari din ke ujale mein kahan

bol andhere ka baDa ta-ba-sahar hota hai

wadi-e-yaad hai aur pa-e-tasawwur 'ehsan'

dekhiye kis tarah mazi ka safar hota hai