shauq-e-warafta ko malhuz-e-adab bhi hoga

shauq-e-vārafta ko malhūz-e-adab bhī hogā

shart hai māl-e-arab pesh-e-arab bhī hogā

lab-o-ruḳhsār meñ hogī gul-o-mahtāb kī baat

aañkh meñ tazkira-e-bint-e-inab bhī hogā

maan letā hai mirī baat mirā hīla-tarāz

aur sab va.adoñ meñ ik va.ada-e-shab bhī hogā

ishq vo shai hai ki barfīle nihāñ-ḳhānoñ meñ

sard paḌ jaa.e sharar-bār to jab bhī hogā

be-ta.alluq hī sahī ye magar us shaḳhs ke paas

dil jo lagtā hai to lagne kā sabab bhī hogā

har galī shahr kī ġhālīcha-e-ushshāq nahīñ

ḳhūn-e-nāhaq hai to phir dād-talab bhī hogā

qahr darvesh to hotā hai ba-jān-e-darvesh

zer-e-farmān jo hotā thā so ab bhī hogā

karb ke zahr kā maarā huā insān hai ye

sar pe sau bojh magar ḳhanda-ba-lab bhī hogā

ik asā paas na ho zo.am-e-kalīmī bhī ho

aisā lagtā hai ki ye kār-e-ajab bhī hogā

yuuñ to be-āb haiñ ḳheme ye jahāñ tak bhī haiñ

dil ye kahtā hai kahīñ abr-e-tarab bhī hogā

shauq-e-warafta ko malhuz-e-adab bhi hoga

shart hai mal-e-arab pesh-e-arab bhi hoga

lab-o-ruKHsar mein hogi gul-o-mahtab ki baat

aankh mein tazkira-e-bint-e-inab bhi hoga

man leta hai meri baat mera hila-taraaz

aur sab wadon mein ek wada-e-shab bhi hoga

ishq wo shai hai ki barfile nihan-KHanon mein

sard paD jae sharar-bar to jab bhi hoga

be-talluq hi sahi ye magar us shaKHs ke pas

dil jo lagta hai to lagne ka sabab bhi hoga

har gali shahr ki ghaalicha-e-ushshaq nahin

KHun-e-nahaq hai to phir dad-talab bhi hoga

qahr darwesh to hota hai ba-jaan-e-darwesh

zer-e-farman jo hota tha so ab bhi hoga

karb ke zahr ka mara hua insan hai ye

sar pe sau bojh magar KHanda-ba-lab bhi hoga

ek asa pas na ho zoam-e-kalimi bhi ho

aisa lagta hai ki ye kar-e-ajab bhi hoga

yun to be-ab hain KHeme ye jahan tak bhi hain

dil ye kahta hai kahin abr-e-tarab bhi hoga