shauq karta hai safar bang-e-dara se pahle

shauq kartā hai safar bāñg-e-darā se pahle

kaan bajte haiñ mohabbat meñ sadā se pahle

shart itnī hai ki takmīl ho mahrūmī kī

jalva dikhlātī hai tāsīr duā se pahle

ishq aur husn kisī ahd meñ be-lāg na the

mahviyat shauq se shoḳhī thī hayā se pahle

muḳhtasar zindagī-e-ishq kī rūdād ye hai

maut aatī hai ka.ī baar qazā se pahle

is bure haal meñ bhī pās-e-mohabbat dekho

dil ne dam toḌ diyā ḳhūn-e-vafā se pahle

zānū-e-dost pe rāhat ye milī vaqt-e-aḳhīr

lag ga.ī aañkh murī ḳhvāb-e-fanā se pahle

aaj haiñ fitna-e-daurān-o-qayāmat āshob

vahī nazreñ jo na uThtī thiiñ hayā se pahle

dāstāñ husn-e-haqīqat kī thī rangīn lekin

itnī rangīñ na thī ḳhūn-e-shohadā se pahle

is kamī par hai vo aalam ki ilāhī tauba

haa.e kyā chiiz the tum tark-e-vafā se pahle

abhī zebā nahīñ tujh ko gila-e-be-asarī

ḳhūn-e-dil shart hai tāsīr-e-vafā se pahle

badle badle se haiñ kuchh husn ke tevar aise

sar-nigūñ ishq hai iqrār-e-ḳhatā se pahle

dil meñ yuuñ hai tirī nikhrī huī zulfoñ kā ḳhayāl

jaise matl.a pe dhuñdalkā ho ghaTā se pahle

haa.e be-ḳhvābī-e-yak-umr-e-vafā kā ye ma.aal

so gayā maiñ tire dāman kī havā se pahle

hai vo bālīda-o-shādāb chaman tab.a-e-'sarosh'

phuul khilte haiñ jahāñ bād-e-sabā se pahle

shauq karta hai safar bang-e-dara se pahle

kan bajte hain mohabbat mein sada se pahle

shart itni hai ki takmil ho mahrumi ki

jalwa dikhlati hai tasir dua se pahle

ishq aur husn kisi ahd mein be-lag na the

mahwiyat shauq se shoKHi thi haya se pahle

muKHtasar zindagi-e-ishq ki rudad ye hai

maut aati hai kai bar qaza se pahle

is bure haal mein bhi pas-e-mohabbat dekho

dil ne dam toD diya KHun-e-wafa se pahle

zanu-e-dost pe rahat ye mili waqt-e-aKHir

lag gai aankh muri KHwab-e-fana se pahle

aaj hain fitna-e-dauran-o-qayamat aashob

wahi nazren jo na uThti thin haya se pahle

dastan husn-e-haqiqat ki thi rangin lekin

itni rangin na thi KHun-e-shohada se pahle

is kami par hai wo aalam ki ilahi tauba

hae kya chiz the tum tark-e-wafa se pahle

abhi zeba nahin tujh ko gila-e-be-asari

KHun-e-dil shart hai tasir-e-wafa se pahle

badle badle se hain kuchh husn ke tewar aise

sar-nigun ishq hai iqrar-e-KHata se pahle

dil mein yun hai teri nikhri hui zulfon ka KHayal

jaise matla pe dhundalka ho ghaTa se pahle

hae be-KHwabi-e-yak-umr-e-wafa ka ye maal

so gaya main tere daman ki hawa se pahle

hai wo baalida-o-shadab chaman taba-e-'sarosh'

phul khilte hain jahan baad-e-saba se pahle