shauq ki nigahon ka aaj imtihan kar len

shauq kī nigāhoñ kā aaj imtihāñ kar leñ

be-niyāz nazroñ ko dil kā rāzdāñ kar leñ

jis ke vāste barsoñ sa.ī-e-rā.egāñ kī hai

ab use bhulāne kī sa.ī-e-rā.egāñ kar leñ

rāzdārī-e-ulfat tā-ba-kai kare koī

sargirāñ hai vo yuuñ bhī aur sargirāñ kar leñ

aap ke liye koī dīn-o-dil luTā baiThā

ik nigāh-e-ḳhandāñ kā aap bhī ziyāñ kar leñ

aap se use nisbat aap se ta'alluq kyā

ā.īye zarā ham bhī zikr-e-āsmāñ kar leñ

ek musht-e-ḳhas par ye nūr-e-husn kī bārish

phir kisī tarah ta.amīr apnā āshiyāñ kar leñ

jis qadar mile kam hai dard-e-ishq kī daulat

har hikāyat-e-ġham ko apnī dāstāñ kar leñ

ḳhush-gumāniyāñ un kī vaj.h-e-be-niyāzī haiñ

ruḳhsat ai vafā-keshī kuchh to bad-gumāniyāñ kar leñ

hairat-e-nazāra hai pāsbān-e-chashm-o-dil

aap har karishma ko sarf-e-imtihāñ kar leñ

shauq ki nigahon ka aaj imtihan kar len

be-niyaz nazron ko dil ka raazdan kar len

jis ke waste barson sai-e-raegan ki hai

ab use bhulane ki sai-e-raegan kar len

raazdari-e-ulfat ta-ba-kai kare koi

sargiran hai wo yun bhi aur sargiran kar len

aap ke liye koi din-o-dil luTa baiTha

ek nigah-e-KHandan ka aap bhi ziyan kar len

aap se use nisbat aap se ta'alluq kya

aaiye zara hum bhi zikr-e-asman kar len

ek musht-e-KHas par ye nur-e-husn ki barish

phir kisi tarah tamir apna aashiyan kar len

jis qadar mile kam hai dard-e-ishq ki daulat

har hikayat-e-gham ko apni dastan kar len

KHush-gumaniyan un ki wajh-e-be-niyazi hain

ruKHsat ai wafa-keshi kuchh to bad-gumaniyan kar len

hairat-e-nazara hai pasban-e-chashm-o-dil

aap har karishma ko sarf-e-imtihan kar len