shauq se furqat-e-saqi mein main saghar ke ewaz

shauq se furqat-e-sāqī meñ maiñ sāġhar ke evaz

ashk pī jaatā huuñ maiñ bāda-e-ahmar ke evaz

zulf ko chuum ke lām-e-lab-e-dilbar ke evaz

zahr khā lete haiñ ham qand-e-mukarrar ke evaz

kho ke dil bosa-e-lām-e-lab-e-dilbar ke evaz

mīm-e-mahrūm hue mīm-e-muqaddar ke evaz

dekh o qātil-e-be-rahm garebāñ merā

bose letā hai gulū ke lab-e-ḳhanjar ke evaz

shauq-e-ārā.ish-e-ruḳh ho to pahan lo ai jaan

ashk dāman se uThā kar mire gauhar ke evaz

aabrū paa.ī bun-e-gosh-e-sanam se mil kar

dāna-e-ashk ne kyā dāna-e-gauhar ke evaz

bār-e-ehsāñ ne tire yaar jhukāyā aisā

paañv par aa ga.ī dastār mirī sar ke evaz

be-takalluf tirī shamshīr mujhe ai qātil

zevar-e-zaḳhm pinhā detī hai zevar ke evaz

ḳhāksārān-e-mohabbat ko tire kūche meñ

haath aa.ī hai zamīñ gor ke bistar ke evaz

dekhtā kyā hai mire qatl ke baad ai qātil

qatra-e-ḳhūñ haiñ tirī teġh meñ jauhar ke evaz

parvarish bād-e-fanā jism kī karne ke liye

dāman-e-gor milā dāman-e-mādar ke evaz

jalve dikhlāne lagī saf.ha-e-tan par kyā kyā

fart-e-kāhish se har ik rag rag-e-mistar ke evaz

bāda-e-rashk se labrez huā ai saaqī

halqa-e-chashm mirā halqa-e-sāġhar ke evaz

ātish-e-rashk ne jis vaqt kiyā sard mujhe

tan mirā garm rahā sīna-e-mijmar ke evaz

jā pahuñchtā hai ḳhayāl-e-dil-e-nādāñ us tak

jazb-e-kāmil se shab-e-ġham meñ paiġhambar ke evaz

chashm-e-zāhir se to kyā dīda-e-bātin se kabhī

rū-e-mahtāb na dekhūñ ruḳh-e-dilbar ke evaz

ātish-e-rashk se hai parvarish-e-dil har dam

aap ke ishq meñ ai yaar samundar ke evaz

kyā laḌā.ūñ tirī āñkhoñ se maiñ ai jaan āñkheñ

chādar-e-ashk mire muñh pe hai chādar ke evaz

dur-e-dandāñ ke tasavvur meñ luTā kar dur-e-ashk

mīm-e-muflis hue ham tā-e-tavañgar ke evaz

hukm detā hai 'shagufta' mujhe mai-noshī kā

halqa-e-chashm mirā hijr meñ 'sāġhar' ke evaz

shauq se furqat-e-saqi mein main saghar ke ewaz

ashk pi jata hun main baada-e-ahmar ke ewaz

zulf ko chum ke lam-e-lab-e-dilbar ke ewaz

zahr kha lete hain hum qand-e-mukarrar ke ewaz

kho ke dil bosa-e-lam-e-lab-e-dilbar ke ewaz

mim-e-mahrum hue mim-e-muqaddar ke ewaz

dekh o qatil-e-be-rahm gareban mera

bose leta hai gulu ke lab-e-KHanjar ke ewaz

shauq-e-araish-e-ruKH ho to pahan lo ai jaan

ashk daman se uTha kar mere gauhar ke ewaz

aabru pai bun-e-gosh-e-sanam se mil kar

dana-e-ashk ne kya dana-e-gauhar ke ewaz

bar-e-ehsan ne tere yar jhukaya aisa

panw par aa gai dastar meri sar ke ewaz

be-takalluf teri shamshir mujhe ai qatil

zewar-e-zaKHm pinha deti hai zewar ke ewaz

KHaksaran-e-mohabbat ko tere kuche mein

hath aai hai zamin gor ke bistar ke ewaz

dekhta kya hai mere qatl ke baad ai qatil

qatra-e-KHun hain teri tegh mein jauhar ke ewaz

parwarish baad-e-fana jism ki karne ke liye

daman-e-gor mila daman-e-madar ke ewaz

jalwe dikhlane lagi safha-e-tan par kya kya

fart-e-kahish se har ek rag rag-e-mistar ke ewaz

baada-e-rashk se labrez hua ai saqi

halqa-e-chashm mera halqa-e-saghar ke ewaz

aatish-e-rashk ne jis waqt kiya sard mujhe

tan mera garm raha sina-e-mijmar ke ewaz

ja pahunchta hai KHayal-e-dil-e-nadan us tak

jazb-e-kaamil se shab-e-gham mein paighambar ke ewaz

chashm-e-zahir se to kya dida-e-baatin se kabhi

ru-e-mahtab na dekhun ruKH-e-dilbar ke ewaz

aatish-e-rashk se hai parwarish-e-dil har dam

aap ke ishq mein ai yar samundar ke ewaz

kya laDaun teri aankhon se main ai jaan aankhen

chadar-e-ashk mere munh pe hai chadar ke ewaz

dur-e-dandan ke tasawwur mein luTa kar dur-e-ashk

mim-e-muflis hue hum ta-e-tawangar ke ewaz

hukm deta hai 'shagufta' mujhe mai-noshi ka

halqa-e-chashm mera hijr mein 'saghar' ke ewaz