sher-o-suKHan pe baat ho zariya koi to ho

sher-o-suḳhan pe baat ho zarīya koī to ho

rātoñ ko jāgne kā bahāna koī to ho

ḳhush-rang ḳhvāb duur khaḌe muntazir haiñ yaar

āñkhoñ meñ ḳhushbuoñ kā darīcha koī to ho

phir intiḳhāb dasht meñ merā kiyā gayā

kahtā thā qais kaam kā banda koī to ho

ai mālik-e-azīm tire is jahān meñ

jhūTe to be-shumār haiñ sachchā koī to ho

us ḳhush-badan ke qurb ke lamhe nasīb hoñ

aisā hamāre saath karishma koī to ho

dukh aaj mujh ko haal batāte haiñ is tarah

ḳhāmosh ho ga.e ho tamāshā koī to ho

kis ke supurd kar ke ye māl-o-matā' chalūñ

merī udāsiyoñ ko muhayyā koī to ho

zād-e-safar meñ rakh liyā ham ne tumhārā naam

raste meñ apne paas havāla koī to ho

mujh ko bhī dekhne haiñ ḳhudā ke na.e jahān

hijrat kā mere yaar vasīla koī to ho

rakkhī huī haiñ vaqt kī ghaḌiyāñ sameT kar

in meñ tire visāl kā lamha koī to ho

jaanā hai qāfiloñ ne ziyārat ke shauq meñ

lekin pahuñchne ke liye rasta koī to ho

terā jo dil nahīñ hai to phir ġhair hī sahī

nākām ḳhvāhishoñ kā Thikāna koī to ho

sher-o-suKHan pe baat ho zariya koi to ho

raaton ko jagne ka bahana koi to ho

KHush-rang KHwab dur khaDe muntazir hain yar

aankhon mein KHushbuon ka daricha koi to ho

phir intiKHab dasht mein mera kiya gaya

kahta tha qais kaam ka banda koi to ho

ai malik-e-azim tere is jahan mein

jhuTe to be-shumar hain sachcha koi to ho

us KHush-badan ke qurb ke lamhe nasib hon

aisa hamare sath karishma koi to ho

dukh aaj mujh ko haal batate hain is tarah

KHamosh ho gae ho tamasha koi to ho

kis ke supurd kar ke ye mal-o-mata' chalun

meri udasiyon ko muhayya koi to ho

zad-e-safar mein rakh liya hum ne tumhaara nam

raste mein apne pas hawala koi to ho

mujh ko bhi dekhne hain KHuda ke nae jahan

hijrat ka mere yar wasila koi to ho

rakkhi hui hain waqt ki ghaDiyan sameT kar

in mein tere visal ka lamha koi to ho

jaana hai qafilon ne ziyarat ke shauq mein

lekin pahunchne ke liye rasta koi to ho

tera jo dil nahin hai to phir ghair hi sahi

nakaam KHwahishon ka Thikana koi to ho