shiddat-e-tishna-labi jo usko bhaTkati nahin

shiddat-e-tishna-labī jo us ko bhaTkātī nahīñ

to nadī koī samundar kī taraf jaatī nahīñ

zindagī meñ aa.e din baḌhte masā.il kā sabab

'aql ko dil aur dil ko 'aql samjhātī nahīñ

josh meñ aa kar yahāñ par hosh kho dete haiñ log

maiñ bhī jazbātī huuñ lekin itnā jazbātī nahīñ

zindagī meñ tū nahīñ to zindagī hai be-mazā

vo diyā kis kaam kā jis kī koī baatī nahīñ

jitne ġham haiñ sab ke sab baḳhshe mujhe aġhyār ne

sach kahūñ to merā apnā koī ġham zaatī nahīñ

ye sitam ye zulm to Dhaa.e haiñ 'rāhib' chhāñv ne

dhuup se koī kalī gulshan meñ murjhātī nahīñ

shiddat-e-tishna-labi jo us ko bhaTkati nahin

to nadi koi samundar ki taraf jati nahin

zindagi mein aae din baDhte masail ka sabab

'aql ko dil aur dil ko 'aql samjhati nahin

josh mein aa kar yahan par hosh kho dete hain log

main bhi jazbaati hun lekin itna jazbaati nahin

zindagi mein tu nahin to zindagi hai be-maza

wo diya kis kaam ka jis ki koi baati nahin

jitne gham hain sab ke sab baKHshe mujhe aghyar ne

sach kahun to mera apna koi gham zati nahin

ye sitam ye zulm to Dhae hain 'rahib' chhanw ne

dhup se koi kali gulshan mein murjhati nahin