shiddat se maine KHud ko ubhaara zamin par

shiddat se maiñ ne ḳhud ko ubhārā zamīn par

saayā magar banā hai tumhārā zamīn par

aa kar vo is tarah mirī bāhoñ meñ gir gayā

girtā hai jaise TuuT ke taara zamīn par

rang-e-bahār ab ke ḳhizāñ le ke uḌ ga.ī

chhoḌā nahīñ hai koī nazārā zamīn par

dekhā zamīn par to nigāheñ jhulas uThīñ

aks-e-badan hai terā sharāra zamīn par

vahshat ne āsmān pe mujh ko biThā diyā

ḳhuddāriyoñ ne phir se utārā zamīn par

likh likh ke pheñk Daale haiñ tujh ko hazār ḳhat

yuuñ apne dil kā bojh utārā zamīn par

āñkhoñ ne ashk-e-yās bahā.e to pī ga.e

karnā paḌā hai yuuñ bhī guzārā zamīn par

ḳhāmoshiyāñ bhī chīḳh rahī haiñ sadāoñ meñ

maarā gayā hai dard kā maarā zamīn par

bādal tamām ab ke samundar meñ jā gire

ye kis ne āñsuoñ ko pukārā zamīn par

ik āshiyāñ falak pe banā.eñge ham 'azān'

jī tang aa gayā hai hamārā zamīn par

shiddat se main ne KHud ko ubhaara zamin par

saya magar bana hai tumhaara zamin par

aa kar wo is tarah meri bahon mein gir gaya

girta hai jaise TuT ke tara zamin par

rang-e-bahaar ab ke KHizan le ke uD gai

chhoDa nahin hai koi nazara zamin par

dekha zamin par to nigahen jhulas uThin

aks-e-badan hai tera sharara zamin par

wahshat ne aasman pe mujh ko biTha diya

KHuddariyon ne phir se utara zamin par

likh likh ke phenk Dale hain tujh ko hazar KHat

yun apne dil ka bojh utara zamin par

aankhon ne ashk-e-yas bahae to pi gae

karna paDa hai yun bhi guzara zamin par

KHamoshiyan bhi chiKH rahi hain sadaon mein

mara gaya hai dard ka mara zamin par

baadal tamam ab ke samundar mein ja gire

ye kis ne aansuon ko pukara zamin par

ek aashiyan falak pe banaenge hum 'azan'

ji tang aa gaya hai hamara zamin par