shish-mahal ki oT se chhup kar kuTiya par yalghaar karegi

shīsh-mahal kī oT se chhup kar kuTiyā par yalġhār karegī

ya.anī ik zardār kī beTī ik nirdhan se pyaar karegī

galī galī danke pīTegī nagar nagar parchār karegī

jaan rahā huuñ mujh ko rusvā tū bhī sar-e-bāzār karegī

ishq kī azmat ke afsāne insānī aqdār kī bāteñ

vo harjā.ī kyā jānegī paisoñ se jo pyaar karegī

iisā aur suqrāt na banñā varna ik din tum ko duniyā

haath meñ zahr kā pyāla de kar zeb-e-salīb-o-dār karegī

ab ke phir jo kaal paḌā to har albelī gaañv kī gorī

phir se sonā-gāchhī jākar tan kā kārobār karegī

'ashk' mujhe kab is kī ḳhabar thī ik paglī gūñgī sī laḌkī

raat huī to lorī degī sub.h mujhe bedār karegī

shish-mahal ki oT se chhup kar kuTiya par yalghaar karegi

yani ek zardar ki beTi ek nirdhan se pyar karegi

gali gali danke piTegi nagar nagar parchaar karegi

jaan raha hun mujh ko ruswa tu bhi sar-e-bazar karegi

ishq ki azmat ke afsane insani aqdar ki baaten

wo harjai kya jaanegi paison se jo pyar karegi

isa aur suqraat na banna warna ek din tum ko duniya

hath mein zahr ka pyala de kar zeb-e-salib-o-dar karegi

ab ke phir jo kal paDa to har albeli ganw ki gori

phir se sona-gachhi jakar tan ka karobar karegi

'ashk' mujhe kab is ki KHabar thi ek pagli gungi si laDki

raat hui to lori degi subh mujhe bedar karegi