shisha-e-dil mein tere waste baal aaya kyun

shīsha-e-dil meñ tire vāste baal aayā kyuuñ

ye mujhe tujh se na milne kā ḳhayāl aayā kyuuñ

maiñ to ḳhush thā ki tirā maan rakhā hai maiñ ne

tere chehre pe magar aks-e-malāl aayā kyuuñ

aur bhī ġham the magar ek nayā ġham ye hai

maiñ tire sāmne yuuñ ġham se niDhāl aayā kyuuñ

kaise is dil ko mire chain milā avval-e-shab

dard kī surma.ī shāmoñ pe zavāl aayā kyuuñ

sirf ik kār-e-mohabbat thā jo karnā thā mujhe

apne zimme ka.ī kaam aur nikāl aayā kyuuñ

ik sitāra mirī dahlīz pe TuuTā kaise

ik samundar ko mire dar pe ubaal aayā kyuuñ

us kī ma.asūm nigāhoñ meñ na thā jis kā javāb

mere hoñToñ pe vahī harf-e-savāl aayā kyuuñ

shisha-e-dil mein tere waste baal aaya kyun

ye mujhe tujh se na milne ka KHayal aaya kyun

main to KHush tha ki tera man rakha hai main ne

tere chehre pe magar aks-e-malal aaya kyun

aur bhi gham the magar ek naya gham ye hai

main tere samne yun gham se niDhaal aaya kyun

kaise is dil ko mere chain mila awwal-e-shab

dard ki surmai shamon pe zawal aaya kyun

sirf ek kar-e-mohabbat tha jo karna tha mujhe

apne zimme kai kaam aur nikal aaya kyun

ek sitara meri dahliz pe TuTa kaise

ek samundar ko mere dar pe ubaal aaya kyun

us ki masum nigahon mein na tha jis ka jawab

mere honTon pe wahi harf-e-sawal aaya kyun