shishon ki baat aur hai saghar ki baat aur

shīshoñ kī baat aur hai sāġhar kī baat aur

saaqī hai terī chashm-e-fusūñ-gar kī baat aur

fānūs ne faroġh diyā sham-e-husn ko

parde se baḌh ga.ī ruḳh-e-anvar kī baat aur

ishrat-sarā-e-ḳhuld kā munkir to maiñ nahīñ

lekin tumhāre dam se hai is ghar kī baat aur

dil nāzukī meñ fard ḳhirad saḳhtiyoñ meñ taaq

shīshe kī baat aur hai patthar kī baat aur

vo bar-sabīl-e-dāvat-e-tauba sahī magar

kuchh der nāsehā mai-o-sāġhar kī baat aur

donoñ haiñ ek phir bhī jarāhat meñ farq hai

abrū kī baat aur hai ḳhanjar kī baat aur

bahr-e-sujūd yuuñ to hazāroñ haiñ āstāñ

un sab kī baat aur hai us dar kī baat aur

āsār kah rahe haiñ ki manzil qarīb hai

vaise to ham-safar hai muqaddar kī baat aur

donoñ kī shakl ek hai qīmat judā judā

aañsū kī baat aur hai gauhar kī baat aur

'fārūq' un ke va.ada-e-fardā pe ḳhush na ho

andar kī baat aur hai uupar kī baat aur

shishon ki baat aur hai saghar ki baat aur

saqi hai teri chashm-e-fusun-gar ki baat aur

fanus ne farogh diya sham-e-husn ko

parde se baDh gai ruKH-e-anwar ki baat aur

ishrat-sara-e-KHuld ka munkir to main nahin

lekin tumhaare dam se hai is ghar ki baat aur

dil nazuki mein fard KHirad saKHtiyon mein taq

shishe ki baat aur hai patthar ki baat aur

wo bar-sabil-e-dawat-e-tauba sahi magar

kuchh der naseha mai-o-saghar ki baat aur

donon hain ek phir bhi jarahat mein farq hai

abru ki baat aur hai KHanjar ki baat aur

bahr-e-sujud yun to hazaron hain aastan

un sab ki baat aur hai us dar ki baat aur

aasar kah rahe hain ki manzil qarib hai

waise to ham-safar hai muqaddar ki baat aur

donon ki shakl ek hai qimat juda juda

aansu ki baat aur hai gauhar ki baat aur

'faruq' un ke wada-e-farda pe KHush na ho

andar ki baat aur hai upar ki baat aur