shikayat-e-gham-e-hijran is ehtimam ke sath

shikāyat-e-ġham-e-hijrāñ is ehtimām ke saath

ki dil ḳhamosh huā hai kisī ke naam se saath

qusūr thā lab-o-lahja kā varna ai saaqī

kahāñ thā mai kā taqāzā mire salām ke saath

masarratoñ ne jo chheḌā to aañkh bhar aa.ī

hañsī bhī aa.ī mujhe ġham ke ehtirām ke saath

zarūr gardish-e-daurāñ kī saañs ruk jaatī

tumhārā raqs bhī hotā jo raqs-e-jām ke saath

usī kā ham-safar-e-shauq kar diyā mujh ko

zamāna chal na sakā jis subuk-ḳhirām ke saath

nazāra yuuñ ho ki nazroñ kī tishnagī na bujhe

ye shart-e-ḳhās bhī rakh dī hai izn-e-ām ke saath

hai ḳhud hī ek mukammal fasāna ai 'jauhar'

kisī kā naam mire zikr-e-nā-tamām ke saath

shikayat-e-gham-e-hijran is ehtimam ke sath

ki dil KHamosh hua hai kisi ke nam se sath

qusur tha lab-o-lahja ka warna ai saqi

kahan tha mai ka taqaza mere salam ke sath

masarraton ne jo chheDa to aankh bhar aai

hansi bhi aai mujhe gham ke ehtiram ke sath

zarur gardish-e-dauran ki sans ruk jati

tumhaara raqs bhi hota jo raqs-e-jam ke sath

usi ka ham-safar-e-shauq kar diya mujh ko

zamana chal na saka jis subuk-KHiram ke sath

nazara yun ho ki nazron ki tishnagi na bujhe

ye shart-e-KHas bhi rakh di hai izn-e-am ke sath

hai KHud hi ek mukammal fasana ai 'jauhar'

kisi ka nam mere zikr-e-na-tamam ke sath