shikan jabin pe na lae nazar jhuka ke chale

shikan jabīñ pe na laa.e nazar jhukā ke chale

ḳhudī kī laash uThānī hī thī uThā ke chale

ye mai-kada hai yahāñ laġhzishoñ se raunaq hai

koī bahak ke chale koī laḌkhaḌā ke chale

Thahar ga.e to zamāne ko saath Thahrāyā

chale to hosh uḌāte hue havā ke chale

ġham-e-hayāt ko samjhe the ahl-e-dil bhārī

hameñ hai naaz ki ye bojh bhī uThā ke chale

vo bāda-ḳhvār nahīñ aur kuchh hai ai saaqī

sharāb pī ke jo mānind pārsā ke chale

rah-e-junūñ meñ hazāroñ the ham-safar lekin

charāġh le ke ham hī sāmne havā ke chale

vo jām-e-mai ho ki ho jām-e-angabīñ 'ehsāñ'

chale jo daur bhī vo zarf aazmā ke chale

shikan jabin pe na lae nazar jhuka ke chale

KHudi ki lash uThani hi thi uTha ke chale

ye mai-kada hai yahan laghzishon se raunaq hai

koi bahak ke chale koi laDkhaDa ke chale

Thahar gae to zamane ko sath Thahraya

chale to hosh uDate hue hawa ke chale

gham-e-hayat ko samjhe the ahl-e-dil bhaari

hamein hai naz ki ye bojh bhi uTha ke chale

wo baada-KHwar nahin aur kuchh hai ai saqi

sharab pi ke jo manind parsa ke chale

rah-e-junun mein hazaron the ham-safar lekin

charagh le ke hum hi samne hawa ke chale

wo jam-e-mai ho ki ho jam-e-angabin 'ehsan'

chale jo daur bhi wo zarf aazma ke chale