shikast-e-sham ka manzar bhari bahaar mein tha

shikast-e-shām kā manzar bharī bahār meñ thā

maiñ apne ghar meñ bhī rah kar kisī hisār meñ thā

maiñ ik ġharīb vo lākhoñ ke kārobār meñ thā

mirā vajūd magar phir bhī iḳhtiyār meñ thā

kiyā hai apne hī logoñ ne pā.emāl mujhe

gilā ho kis se ki maiñ ḳhud hī e.atibār meñ thā

bahār kī jagah kaise ḳhizāñ chalī aa.ī

numū kā hausla jab shāḳh-e-barg-o-bār meñ thā

nikal sakā na vo zulmāt kī kashākash se

sahar ke vāste vo kab se intizār meñ thā

jo apnī zaat meñ ik anjuman rahā ai 'shauq'

bikhar gayā to vo yādoñ kī rahguzār meñ thā

shikast-e-sham ka manzar bhari bahaar mein tha

main apne ghar mein bhi rah kar kisi hisar mein tha

main ek gharib wo lakhon ke karobar mein tha

mera wajud magar phir bhi iKHtiyar mein tha

kiya hai apne hi logon ne paemal mujhe

gila ho kis se ki main KHud hi eatibar mein tha

bahaar ki jagah kaise KHizan chali aai

numu ka hausla jab shaKH-e-barg-o-bar mein tha

nikal saka na wo zulmat ki kashakash se

sahar ke waste wo kab se intizar mein tha

jo apni zat mein ek anjuman raha ai 'shauq'

bikhar gaya to wo yaadon ki rahguzar mein tha