shikasta dil kisi ka ho hum apna dil samajhte hain

shikasta dil kisī kā ho ham apnā dil samajhte haiñ

tire ġham meñ zamāne bhar ke ġham shāmil samajhte haiñ

huī haiñ is qadar āsāniyoñ se mushkileñ paidā

har āsānī ko ham apnī jagah mushkil samajhte haiñ

vo ḳhud dekhe magar us ko koī na dekhne paa.e

tirā andāz ham ai parda-e-hā.il samajhte haiñ

kisī kā haath zaḳhmoñ par kisī kā haath gardan meñ

masīhā kaun hai aur kaun hai qātil samajhte haiñ

had-e-dil se to bāhar dard terā ho nahīñ saktā

jahāñ tak dard hai terā vahāñ tak dil samajhte haiñ

majāl-e-dīd kī mohlat na deñ lekin ye kyā kam hai

vo ham ko apnī bazm-e-nāz ke qābil samajhte haiñ

ta.ayyun husn-e-maqsad kā nahīñ is ke sivā koī

Thahar jaa.eñ jahāñ ham bas use manzil samajhte haiñ

kahāñ tak ham musalsal ruḳh badalte jaa.eñ kashtī kā

vahī tūfāñ nikaltā hai jise sāhil samajhte haiñ

unheñ fursat kahāñ ye bhī ġhanīmat jāniye 'aḳhgar'

ki vo dil ko kisī ta.azīr ke qābil samajhte haiñ

shikasta dil kisi ka ho hum apna dil samajhte hain

tere gham mein zamane bhar ke gham shamil samajhte hain

hui hain is qadar aasaniyon se mushkilen paida

har aasani ko hum apni jagah mushkil samajhte hain

wo KHud dekhe magar us ko koi na dekhne pae

tera andaz hum ai parda-e-hail samajhte hain

kisi ka hath zaKHmon par kisi ka hath gardan mein

masiha kaun hai aur kaun hai qatil samajhte hain

had-e-dil se to bahar dard tera ho nahin sakta

jahan tak dard hai tera wahan tak dil samajhte hain

majal-e-did ki mohlat na den lekin ye kya kam hai

wo hum ko apni bazm-e-naz ke qabil samajhte hain

tayyun husn-e-maqsad ka nahin is ke siwa koi

Thahar jaen jahan hum bas use manzil samajhte hain

kahan tak hum musalsal ruKH badalte jaen kashti ka

wahi tufan nikalta hai jise sahil samajhte hain

unhen fursat kahan ye bhi ghanimat jaaniye 'aKHgar'

ki wo dil ko kisi tazir ke qabil samajhte hain