shikasta-haal safina sambhaalne wala

shikasta-hāl safīna sambhālne vaalā

koī nahīñ hai bhañvar se nikālne vaalā

koī nahīñ hai tirī yaad tere ġham ke sivā

azāb-e-gardish-e-daurāñ ko Tālne vaalā

navāz de jise chāhe ba-yak nigāh-e-karam

gumāñ ko naqsh-e-haqīqat meñ Dhālne vaalā

nafas nafas ke amal kā hisāb rakhtā hai

vo sat.h-e-bahr se paanī uchhālne vaalā

ḳhud apne haal se begāna hotā jaatā hai

jahāñ ke dard ko siine meñ pālne vaalā

kisī ke husn ne chhoḌā kahāñ hai kab koī

matā-e-hosh-o-ḳhirad ko sambhālne vaalā

hamīñ to the jo sañbhāle the nazm-e-mai-ḳhāna

ab aage kaun hai is ko sambhālne vaalā

tulūa hogā vo sūraj to hogā mashriq se

kiran kiran se zamīñ ko ujālne vaalā

suḳhan meñ harf-o-hikāyat ke gauhar-e-nāyāb

vahī to hai mirī jholī meñ Dālne vaalā

dilāse dete haiñ kyā kyā ham ahl-e-urdu ko

magar koī nahīñ honī ko Tālne vaalā

shikasta-haal safina sambhaalne wala

koi nahin hai bhanwar se nikalne wala

koi nahin hai teri yaad tere gham ke siwa

azab-e-gardish-e-dauran ko Talne wala

nawaz de jise chahe ba-yak nigah-e-karam

guman ko naqsh-e-haqiqat mein Dhaalne wala

nafas nafas ke amal ka hisab rakhta hai

wo sath-e-bahr se pani uchhaalne wala

KHud apne haal se begana hota jata hai

jahan ke dard ko sine mein palne wala

kisi ke husn ne chhoDa kahan hai kab koi

mata-e-hosh-o-KHirad ko sambhaalne wala

hamin to the jo sanbhaale the nazm-e-mai-KHana

ab aage kaun hai is ko sambhaalne wala

tulua hoga wo suraj to hoga mashriq se

kiran kiran se zamin ko ujalne wala

suKHan mein harf-o-hikayat ke gauhar-e-nayab

wahi to hai meri jholi mein Dalne wala

dilase dete hain kya kya hum ahl-e-urdu ko

magar koi nahin honi ko Talne wala