shikasta-pai se bach kar meri nikal bhi gaya

shikasta-pā.ī se bach kar mirī nikal bhī gayā

jo rāhbar thā mirā rāsta badal bhī gayā

karūñgā kyā jo huī phir bhī ātishīñ bārish

jo sā.ebāñ thā mire sar pe vo to jal bhī gayā

havā shadīd hai itnī ye jhoñpaḌe hī nahīñ

amīr-e-shahr tirā ḳhushnumā mahal bhī gayā

kamān khīñchne vaalā hadaf shanās na thā

shikār zad meñ nahīñ thā ki tiir chal bhī gayā

maiñ sochtā hī rahā rāste haiñ pechīda

jo mere saath chalā thā kahīñ nikal bhī gayā

jo tairnā hī nahīñ jāntā vo Dūbegā

zarā sī der ko kyā hai agar sañbhal bhī gayā

baḌā hī biphrā huā dast-e-shāh hai 'āsim'

bachāo ruuh vo jismoñ ko to kuchal bhī gayā

shikasta-pai se bach kar meri nikal bhi gaya

jo rahbar tha mera rasta badal bhi gaya

karunga kya jo hui phir bhi aatishin barish

jo saeban tha mere sar pe wo to jal bhi gaya

hawa shadid hai itni ye jhonpaDe hi nahin

amir-e-shahr tera KHushnuma mahal bhi gaya

kaman khinchne wala hadaf shanas na tha

shikar zad mein nahin tha ki tir chal bhi gaya

main sochta hi raha raste hain pechida

jo mere sath chala tha kahin nikal bhi gaya

jo tairna hi nahin jaanta wo Dubega

zara si der ko kya hai agar sanbhal bhi gaya

baDa hi biphra hua dast-e-shah hai 'asim'

bachao ruh wo jismon ko to kuchal bhi gaya