shikasta pairahanon mein bhi rang sa kuchh hai

shikasta pairahanoñ meñ bhī rang sā kuchh hai

hamāre saath abhī nām-o-nang sā kuchh hai

harīf to sipar-andāz ho chukā kab kā

darūn-e-zāt magar mahv-e-jang sā kuchh hai

kahīñ kisī ke badan se badan na chhū jaa.e

is ehtiyāt meñ ḳhvāhish kā Dhang sā kuchh hai

jo dekhiye to na teġh-e-jafā na merā haath

jo sochiye to kahīñ zer-e-sang sā kuchh hai

vo merī maslahatoñ ko bigāḌne vaalā

hanūz mujh meñ vahī be-darang sā kuchh hai

chalo zamīñ na sahī āsmān hī hogā

mohabbatoñ pe bahar-hāl tang sā kuchh hai

shikasta pairahanon mein bhi rang sa kuchh hai

hamare sath abhi nam-o-nang sa kuchh hai

harif to sipar-andaz ho chuka kab ka

darun-e-zat magar mahw-e-jang sa kuchh hai

kahin kisi ke badan se badan na chhu jae

is ehtiyat mein KHwahish ka Dhang sa kuchh hai

jo dekhiye to na tegh-e-jafa na mera hath

jo sochiye to kahin zer-e-sang sa kuchh hai

wo meri maslahaton ko bigaDne wala

hanuz mujh mein wahi be-darang sa kuchh hai

chalo zamin na sahi aasman hi hoga

mohabbaton pe bahar-haal tang sa kuchh hai