shikoh-e-zat se dushman ka lashkar kanp jata hai

shikoh-e-zāt se dushman kā lashkar kaañp jaatā hai

agar kirdār puḳhta ho sitamgar kaañp jaatā hai

tasavvur meñ ubhartā hai kabhī jab qabr kā manzar

uchaT jaatī haiñ nīñdeñ aur bistar kaañp jaatā hai

mile haiñ zaḳhm kuchh aise mujhe apne rafīqoñ se

ka.ī barsoñ ke kuchh rishtoñ kā mehvar kaañp jaatā hai

kisī bhī jang meñ koī shahādat kī ḳhabar sun kar

sisak uThte haiñ kangan aur zevar kaañp jaatā hai

vo haidar murtazā bhī haiñ vahī sher-e-ḳhudā bhī haiñ

vahī ik naam sun ke ab bhī ḳhaibar kaañp jaatā hai

chale aate haiñ kuchh yuuñ be-salīqa log maiḳhāne

surāhī rone lagtī hai to sāġhar kaañp jaatā hai

vahī be-ḳhauf rahtā hai sadā 'shāyān' duniyā meñ

ḳhudā ke ḳhauf se dil jis kā aksar kaañp jaatā hai

shikoh-e-zat se dushman ka lashkar kanp jata hai

agar kirdar puKHta ho sitamgar kanp jata hai

tasawwur mein ubharta hai kabhi jab qabr ka manzar

uchaT jati hain ninden aur bistar kanp jata hai

mile hain zaKHm kuchh aise mujhe apne rafiqon se

kai barson ke kuchh rishton ka mehwar kanp jata hai

kisi bhi jang mein koi shahadat ki KHabar sun kar

sisak uThte hain kangan aur zewar kanp jata hai

wo haidar murtaza bhi hain wahi sher-e-KHuda bhi hain

wahi ek nam sun ke ab bhi KHaibar kanp jata hai

chale aate hain kuchh yun be-saliqa log maiKHane

surahi rone lagti hai to saghar kanp jata hai

wahi be-KHauf rahta hai sada 'shayan' duniya mein

KHuda ke KHauf se dil jis ka aksar kanp jata hai