shikwa-e-gham na masaib ka gila karte hain

shikva-e-ġham na masā.ib kā gila karte haiñ

rab kā har haal meñ ham shukr adā karte haiñ

vo ibādat nahīñ karte haiñ riyā karte haiñ

jo dikhāve ke liye zikr-e-ḳhudā karte haiñ

ma.arifat ishq kī ho jaatī hai jin ko hāsil

sajda-e-shauq vo teġhoñ meñ adā karte haiñ

ḳhatm hogī na kabhī haq ke charāġhoñ kī ziyā

ye diye tund havā meñ bhī jalā karte haiñ

apne begāne kī tafrīq nahīñ un kā shi.ār

jo bhale log haiñ vo sab kā bhalā karte haiñ

vo bhī mujrim haiñ barābar ke sitamgar kī tarah

har sitam sah ke jo ḳhāmosh rahā karte haiñ

jab lagā rog mohabbat kā to mahsūs huā

log kyoñ ishq ko āzār kahā karte haiñ

haq-bayānī hai agar jurm to ham haiñ mujrim

zulm se laḌnā ḳhatā hai to ḳhatā karte haiñ

husn paidā karo kirdār-o-amal meñ apne

ġhair ko dekho na 'ahsan' ki vo kyā karte haiñ

shikwa-e-gham na masaib ka gila karte hain

rab ka har haal mein hum shukr ada karte hain

wo ibaadat nahin karte hain riya karte hain

jo dikhawe ke liye zikr-e-KHuda karte hain

marifat ishq ki ho jati hai jin ko hasil

sajda-e-shauq wo teghon mein ada karte hain

KHatm hogi na kabhi haq ke charaghon ki ziya

ye diye tund hawa mein bhi jala karte hain

apne begane ki tafriq nahin un ka shiar

jo bhale log hain wo sab ka bhala karte hain

wo bhi mujrim hain barabar ke sitamgar ki tarah

har sitam sah ke jo KHamosh raha karte hain

jab laga rog mohabbat ka to mahsus hua

log kyon ishq ko aazar kaha karte hain

haq-bayani hai agar jurm to hum hain mujrim

zulm se laDna KHata hai to KHata karte hain

husn paida karo kirdar-o-amal mein apne

ghair ko dekho na 'ahsan' ki wo kya karte hain