shikwa hai kisi se na shikayat na gila hai

shikva hai kisī se na shikāyat na gila hai

ye ziist mire jurm-e-mohabbat kī sazā hai

ai sāqi-e-mai-ḳhāna tū kyā soch rahā hai

chhā.ī huī maiḳhāne pe sāvan kī ghaTā hai

ġhairoñ kī shikāyat hai na kuchh tujh se gila hai

mujh se to har ik hamdam-e-derīna ḳhafā hai

ye terā karam hai ki mohabbat kā sila hai

har zaḳhm tirī yaad kā ik phuul banā hai

ai chāragaro tum se to ye bhī nahīñ hotā

ik harf-e-tasallī jo davā hai na duā hai

ab harf-e-tamannā bhī nahīñ lab pe hamāre

kyā kahiye kahāñ ishq ne dam toḌ diyā hai

dāman kī hameñ apne ḳhabar ho na ho lekin

ham ahl-e-junūñ ne tirā dāman to siyā hai

ai mauj-e-havādis na ulajh ham se ki ham ne

ik aan meñ tūfān kā ruḳh moḌ diyā hai

sach pūchhiye 'zamzam' to ab is daur-e-havas meñ

jiine hī kā kuchh lutf na marne kā maza hai

shikwa hai kisi se na shikayat na gila hai

ye zist mere jurm-e-mohabbat ki saza hai

ai saqi-e-mai-KHana tu kya soch raha hai

chhai hui maiKHane pe sawan ki ghaTa hai

ghairon ki shikayat hai na kuchh tujh se gila hai

mujh se to har ek hamdam-e-derina KHafa hai

ye tera karam hai ki mohabbat ka sila hai

har zaKHm teri yaad ka ek phul bana hai

ai chaaragaro tum se to ye bhi nahin hota

ek harf-e-tasalli jo dawa hai na dua hai

ab harf-e-tamanna bhi nahin lab pe hamare

kya kahiye kahan ishq ne dam toD diya hai

daman ki hamein apne KHabar ho na ho lekin

hum ahl-e-junun ne tera daman to siya hai

ai mauj-e-hawadis na ulajh hum se ki hum ne

ek aan mein tufan ka ruKH moD diya hai

sach puchhiye 'zamzam' to ab is daur-e-hawas mein

jine hi ka kuchh lutf na marne ka maza hai