shikwa nahin hai is ka ki tumne bhula diya

shikva nahīñ hai is kā ki tum ne bhulā diyā

achchhā kiyā ki raah kā patthar haTā diyā

ġham ko nashāt-e-zīst kā unvāñ banā diyā

us ne mirī vafā kā ajab sā sila diyā

yuuñ hans ke us ne toḌ diyā rishta-e-ummīd

jaise kisī ne ret pe likkhā miTā diyā

duniyā kī kam-nigāhī ke shikve ke saath saath

ye sochiye ki aap ne duniyā ko kyā diyā

kuchh ham hī shab-gazīda ujāloñ se Dar ga.e

duniyā ne to adab se hameñ rāsta diyā

maiñ vo charāġh-e-bazm-e-tamannā huuñ dosto

jis ko sahar se pahle havā ne bujhā diyā

shikwa nahin hai is ka ki tum ne bhula diya

achchha kiya ki rah ka patthar haTa diya

gham ko nashat-e-zist ka unwan bana diya

us ne meri wafa ka ajab sa sila diya

yun hans ke us ne toD diya rishta-e-ummid

jaise kisi ne ret pe likkha miTa diya

duniya ki kam-nigahi ke shikwe ke sath sath

ye sochiye ki aap ne duniya ko kya diya

kuchh hum hi shab-gazida ujalon se Dar gae

duniya ne to adab se hamein rasta diya

main wo charagh-e-bazm-e-tamanna hun dosto

jis ko sahar se pahle hawa ne bujha diya