shikwa tumhaara ab nahin karte kisi se hum

shikva tumhārā ab nahīñ karte kisī se ham

mānūs ho ga.e haiñ ġham-e-zindagī se ham

dhokā na de sakegī hameñ talḳhī-e-hayāt

khā.eñge ab fareb kisī ajnabī se ham

gum ho ke jis meñ rah ga.e kitne hī kārvāñ

guzre haiñ baar baar usī tīrgī se ham

hañs hañs ke jis ne luuT liiñ saarī masarrateñ

ab bhiik māñgte haiñ usī se ḳhushī kī ham

dīvāna kahne vaale tujhe kuchh ḳhabar bhī hai

lete haiñ kaam hosh kā dīvāngī se ham

sajda ba-qadr-e-hosh fareb-e-tamām hai

vāqif haiñ ḳhuub rasm-o-rah-e-bandagī se ham

irfān-e-zindagī use kyūñkar huā nasīb

ye raaz pūchh leñge kisī din 'vasī' se ham

shikwa tumhaara ab nahin karte kisi se hum

manus ho gae hain gham-e-zindagi se hum

dhoka na de sakegi hamein talKHi-e-hayat

khaenge ab fareb kisi ajnabi se hum

gum ho ke jis mein rah gae kitne hi karwan

guzre hain bar bar usi tirgi se hum

hans hans ke jis ne luT lin sari masarraten

ab bhik mangte hain usi se KHushi ki hum

diwana kahne wale tujhe kuchh KHabar bhi hai

lete hain kaam hosh ka diwangi se hum

sajda ba-qadr-e-hosh fareb-e-tamam hai

waqif hain KHub rasm-o-rah-e-bandagi se hum

irfan-e-zindagi use kyunkar hua nasib

ye raaz puchh lenge kisi din 'wasi' se hum