shoala-KHez-o-shoala-war ab har rah-e-tadbir hai

sho.ala-ḳhez-o-sho.ala-var ab har rah-e-tadbīr hai

zindagī goyā chitā kī boltī tasvīr hai

dekh kar sehn-e-chaman ko ye gumāñ hone lagā

goyā khiñchne ko na.ī sī phir koī tasvīr hai

āshiyāñ kī zindagī se ho chalā hai dil uchāT

phir vahī shauq-e-shahādat dil kā dāman-gīr hai

aaj az-rāh-e-karam bhar de labālab sāqiyā

zauq-e-mai-noshī mirā phir maujib-e-ta.azīr hai

aa rahī hai kaan meñ tauq-o-salāsil kī sadā

naġhma-bar-andāz phir se naġhma-e-zanjīr hai

kashtiyāñ mauj-e-havādis se na Takrā.eñ kahīñ

nāḳhudā kā ḳhvāb jaise tishna-e-ta.abīr hai

'zabt' kī hālat pe rotā hai zamāna dekhiye

fasl-e-gul par rū-e-shabnam us kī ye taqdīr hai

shoala-KHez-o-shoala-war ab har rah-e-tadbir hai

zindagi goya chita ki bolti taswir hai

dekh kar sehn-e-chaman ko ye guman hone laga

goya khinchne ko nai si phir koi taswir hai

aashiyan ki zindagi se ho chala hai dil uchaT

phir wahi shauq-e-shahadat dil ka daman-gir hai

aaj az-rah-e-karam bhar de labaalab saqiya

zauq-e-mai-noshi mera phir maujib-e-tazir hai

aa rahi hai kan mein tauq-o-salasil ki sada

naghma-bar-andaz phir se naghma-e-zanjir hai

kashtiyan mauj-e-hawadis se na Takraen kahin

naKHuda ka KHwab jaise tishna-e-tabir hai

'zabt' ki haalat pe rota hai zamana dekhiye

fasl-e-gul par ru-e-shabnam us ki ye taqdir hai