shoala sa koi barq-e-nazar se nahin uThta

sho.ala sā koī barq-e-nazar se nahīñ uThtā

ab koī dhuāñ dil ke nagar se nahīñ uThtā

vo raunaq-e-kāshāna-e-dil bujh sī ga.ī hai

ab shor koī is bhare ghar se nahīñ uThtā

kab tāqat-e-shorīda-sarī sar ko jo Takrā.eñ

vo zo.af hai ab sar tire dar se nahīñ uThtā

is jumbish-e-mizhgāñ kā huuñ sharminda-e-ehsāñ

ye bār-e-garāñ apnī nazar se nahīñ uThtā

labbaik kahe nāqa-e-lailā ko bhalā kaun

ab qais koī gard-e-safar se nahīñ uThtā

tabdīl huī āb-o-havā shahr-e-vafā kī

ab dard kā tūfān idhar se nahīñ uThtā

yuuñ rāh-e-talab detī hai āvāz hameñ bhī

ab paañv kisī baat ke Dar se nahīñ uThtā

dīvāne ko niiñd aa ga.ī tārīki-e-shab meñ

soyā hai to ab ḳhauf-e-sahar se nahīñ uThtā

yaaro use dekho kahīñ 'bāqar' to nahīñ hai

pahroñ jo kisī rāhguzar se nahīñ uThtā

shoala sa koi barq-e-nazar se nahin uThta

ab koi dhuan dil ke nagar se nahin uThta

wo raunaq-e-kashana-e-dil bujh si gai hai

ab shor koi is bhare ghar se nahin uThta

kab taqat-e-shorida-sari sar ko jo Takraen

wo zoaf hai ab sar tere dar se nahin uThta

is jumbish-e-mizhgan ka hun sharminda-e-ehsan

ye bar-e-garan apni nazar se nahin uThta

labbaik kahe naqa-e-laila ko bhala kaun

ab qais koi gard-e-safar se nahin uThta

tabdil hui aab-o-hawa shahr-e-wafa ki

ab dard ka tufan idhar se nahin uThta

yun rah-e-talab deti hai aawaz hamein bhi

ab panw kisi baat ke Dar se nahin uThta

diwane ko nind aa gai tariki-e-shab mein

soya hai to ab KHauf-e-sahar se nahin uThta

yaro use dekho kahin 'baqar' to nahin hai

pahron jo kisi rahguzar se nahin uThta