shoKH-o-gustaKH jab andaz-e-saba hota hai

shoḳh-o-gustāḳh jab andāz-e-sabā hotā hai

tab kahīñ jā ke hasīñ rañg-e-qabā hotā hai

rañg bharne kī haiñ bāteñ sabhī afsāne meñ

ishq meñ kaun bhalā kis se judā hotā hai

jab dahakte hue hoñToñ kā tasavvur ubhre

dil meñ soyā huā har zaḳhm harā hotā hai

us se kyā kahiye sar-e-rāh koī baat kabhī

gar maiñ mil jā.ūñ mujhe DhūñD rahā hotā hai

ilm vaalo ye zarā paḌh ke batāo mujh ko

kyā ruḳh-e-gul pe ye shabnam se likhā hotā hai

phir ḳhatā pūchh lī tum ne to sazā se pahle

aisī bātoñ se hī 'ḳhālid' vo ḳhafā hotā hai

shoKH-o-gustaKH jab andaz-e-saba hota hai

tab kahin ja ke hasin rang-e-qaba hota hai

rang bharne ki hain baaten sabhi afsane mein

ishq mein kaun bhala kis se juda hota hai

jab dahakte hue honTon ka tasawwur ubhre

dil mein soya hua har zaKHm hara hota hai

us se kya kahiye sar-e-rah koi baat kabhi

gar main mil jaun mujhe DhunD raha hota hai

ilm walo ye zara paDh ke batao mujh ko

kya ruKH-e-gul pe ye shabnam se likha hota hai

phir KHata puchh li tum ne to saza se pahle

aisi baaton se hi 'KHalid' wo KHafa hota hai