shorish-e-sang-e-hawas ko gard main karta chalun

shorish-e-sang-e-havas ko gard maiñ kartā chalūñ

zard lamhoñ kī tapish ko sard maiñ kartā chalūñ

jab bhī apne ghar se niklūñ zindagī kī dhuup meñ

surḳh kāñToñ kī anā ko zard maiñ kartā chalūñ

soḳhta zaḳhmoñ ko ThanDā kar na pā.egī havā

us kī sāñsoñ ko sharīk-e-dard maiñ kartā chalūñ

ret ke amboh meñ chhuptā nahīñ motī koī

bhiiḌ meñ rah kar bhī ḳhud ko fard maiñ kartā chalūñ

kab talak guzregā koī garmī-e-afkār se

jalte lafzoñ ke badan ko sard maiñ kartā chalūñ

rang-o-bū kī tāzgī meñ hai sukūn-e-dil 'nazar'

kis liye in manzaroñ ko zard maiñ kartā chalūñ

shorish-e-sang-e-hawas ko gard main karta chalun

zard lamhon ki tapish ko sard main karta chalun

jab bhi apne ghar se niklun zindagi ki dhup mein

surKH kanTon ki ana ko zard main karta chalun

soKHta zaKHmon ko ThanDa kar na paegi hawa

us ki sanson ko sharik-e-dard main karta chalun

ret ke amboh mein chhupta nahin moti koi

bhiD mein rah kar bhi KHud ko fard main karta chalun

kab talak guzrega koi garmi-e-afkar se

jalte lafzon ke badan ko sard main karta chalun

rang-o-bu ki tazgi mein hai sukun-e-dil 'nazar'

kis liye in manzaron ko zard main karta chalun