shughl hi shughl hai aur aah-e-sahar se kya kaam

shuġhl hī shuġhl hai aur āh-e-sahar se kyā kaam

dard-mandān-e-mohabbat ko asar se kyā kaam

abrū apnī salāmat rahe zar se kyā kaam

ashk-e-tar se mujhe matlab hai guhar se kyā kaam

yaad se gesū-o-ruḳh kī jinheñ matlab Thahrā

shaam se un ko ġharaz kyā hai sahar se kyā kaam

tū ho zulfeñ hoñ tirī shāna ho ā.īna ho

tujh ko be-dard mire dard-e-jigar se kyā kaam

terī ulfat hī nahīñ dil meñ to dil se matlab

terā saudā hī nahīñ sar meñ to sar se kyā kaam

sarguzasht-e-dil-e-majrūh likhī zālim ko

hijr meñ ham ne liyā ḳhūn-e-jigar se kyā kaam

jin ko hañs hañs ke rulānā hī faqat aatā ho

un ke dāman ko mire dīda-e-tar se kyā kaam

dil-e-nāzuk na dhaḌak jaa.e kisī kā 'muztar'

ḳhuun jab ye ho to nāloñ ko asar se kyā kaam

shughl hi shughl hai aur aah-e-sahar se kya kaam

dard-mandan-e-mohabbat ko asar se kya kaam

abru apni salamat rahe zar se kya kaam

ashk-e-tar se mujhe matlab hai guhar se kya kaam

yaad se gesu-o-ruKH ki jinhen matlab Thahra

sham se un ko gharaz kya hai sahar se kya kaam

tu ho zulfen hon teri shana ho aaina ho

tujh ko be-dard mere dard-e-jigar se kya kaam

teri ulfat hi nahin dil mein to dil se matlab

tera sauda hi nahin sar mein to sar se kya kaam

sarguzasht-e-dil-e-majruh likhi zalim ko

hijr mein hum ne liya KHun-e-jigar se kya kaam

jin ko hans hans ke rulana hi faqat aata ho

un ke daman ko mere dida-e-tar se kya kaam

dil-e-nazuk na dhaDak jae kisi ka 'muztar'

KHun jab ye ho to nalon ko asar se kya kaam