shujaat ki misalen qabr ke patthar mein rakkhi hain

shujā.at kī misāleñ qabr ke patthar meñ rakkhī haiñ

hamārī saarī shamshīreñ ajā.ib ghar meñ rakkhī haiñ

havā kī dushmanī se hausle TuuTe nahīñ us ke

uḌāneñ to parinde ke shikasta-par meñ rakkhī haiñ

jise chāhe dikhātā hai jise chāhe miTātā hai

ki tasvīreñ sabhī ab dast-e-shīsha-gar meñ rakkhī haiñ

charāġhoñ ke mohalle meñ bahut tezī se chaltī hai

ye kaisī vahshateñ yārab havā ke sar meñ rakkhī haiñ

hamāre ba.ad aane vāloñ ko koī to samjhā.e

ga.e vaqtoñ kī tārīḳheñ har ik patthar meñ rakkhī haiñ

guloñ se qurbateñ sābit faqat ḳhushbū se hotī haiñ

qabā.eñ to sabā kī qabza-e-sarsar meñ rakkhī haiñ

ham apnā sāz-o-sāmāñ le to aa.e haiñ na.e ghar meñ

magar kuchh dastakeñ ab bhī purāne ghar meñ rakkhī haiñ

vo rāh-e-vasl ki paikar nahīñ bīnā.ī chaltī thī

mirī āñkheñ tire dīdār ke manzar meñ rakkhī haiñ

shujaat ki misalen qabr ke patthar mein rakkhi hain

hamari sari shamshiren ajaib ghar mein rakkhi hain

hawa ki dushmani se hausle TuTe nahin us ke

uDanen to parinde ke shikasta-par mein rakkhi hain

jise chahe dikhata hai jise chahe miTata hai

ki taswiren sabhi ab dast-e-shisha-gar mein rakkhi hain

charaghon ke mohalle mein bahut tezi se chalti hai

ye kaisi wahshaten yarab hawa ke sar mein rakkhi hain

hamare baad aane walon ko koi to samjhae

gae waqton ki tariKHen har ek patthar mein rakkhi hain

gulon se qurbaten sabit faqat KHushbu se hoti hain

qabaen to saba ki qabza-e-sarsar mein rakkhi hain

hum apna saz-o-saman le to aae hain nae ghar mein

magar kuchh dastaken ab bhi purane ghar mein rakkhi hain

wo rah-e-wasl ki paikar nahin binai chalti thi

meri aankhen tere didar ke manzar mein rakkhi hain