shukr karne ko hai zaban koi

shukr karne ko hai zabāñ koī

aaj shāyad hai mehrbāñ koī

hai tamanna abhī javāñ koī

aur baaqī hai imtihāñ koī

laakh kahlā.e lā-makāñ koī

dil ko matlūb hai nishāñ koī

hai bahāroñ pe gulsitāñ koī

gul khilāne ko hai jahāñ koī

ye tasavvur meñ aa rahā hai nazar

mere un ke hai darmiyāñ koī

hosh aa.e to āstāñ DhūñDe

sajda-gar ho to kyoñ kahāñ koī

kyā kisī ne mujhe pukārā phir

aur baaqī hai imtihāñ koī

chashm-e-rindāñ ye rang hai dil kā

hai nigāhoñ meñ āsmāñ koī

rind jaur-e-falak se nālāñ haiñ

aur DhūñDeñge āstāñ koī

aah karne se manā kartā hai

soz-e-dil meñ bhī hai nihāñ koī

be-ruḳhī ishq se nahīñ achchhī

ban na jaa.e ye dāstāñ koī

ye chaman hai to ham bhī ai sayyād

phir banā leñge āshiyāñ koī

is liye sāmne nahīñ aate

raaz ho jā.egā ayaañ koī

ġham kī duniyā meñ ḳhush-nasībī se

'shād' hotā hai mehrbāñ koī

shukr karne ko hai zaban koi

aaj shayad hai mehrban koi

hai tamanna abhi jawan koi

aur baqi hai imtihan koi

lakh kahlae la-makan koi

dil ko matlub hai nishan koi

hai bahaaron pe gulsitan koi

gul khilane ko hai jahan koi

ye tasawwur mein aa raha hai nazar

mere un ke hai darmiyan koi

hosh aae to aastan DhunDe

sajda-gar ho to kyon kahan koi

kya kisi ne mujhe pukara phir

aur baqi hai imtihan koi

chashm-e-rindan ye rang hai dil ka

hai nigahon mein aasman koi

rind jaur-e-falak se nalan hain

aur DhunDenge aastan koi

aah karne se mana karta hai

soz-e-dil mein bhi hai nihan koi

be-ruKHi ishq se nahin achchhi

ban na jae ye dastan koi

ye chaman hai to hum bhi ai sayyaad

phir bana lenge aashiyan koi

is liye samne nahin aate

raaz ho jaega ayan koi

gham ki duniya mein KHush-nasibi se

'shad' hota hai mehrban koi