shumar karta hai mujhko wo har kisi ki tarah

shumār kartā hai mujh ko vo har kisī kī tarah

mujhe to maut bhī aatī hai zindagī kī tarah

jahāñ ke peḌ bhī ham se kalām karte the

ab us galī se guzarte haiñ ajnabī kī tarah

tujhe bayān bhī kar duuñ pa kaun mānegā

utar rahā hai tū mujh meñ kisī vah.y kī tarah

vo tishna-lab huuñ ki patthar nichoḌ kar rakh duuñ

magar ye pyaas to bahtī nahīñ nadī kī tarah

maiñ us ko dekhtā rahtā huuñ TikTikī bāñdhe

fasīl ghūmne lagtī hai phir ghaḌī kī tarah

zarā sī der ko ojhal agar vo hotā hai

añdherā phailne lagtā hai raushnī kī tarah

shumar karta hai mujh ko wo har kisi ki tarah

mujhe to maut bhi aati hai zindagi ki tarah

jahan ke peD bhi hum se kalam karte the

ab us gali se guzarte hain ajnabi ki tarah

tujhe bayan bhi kar dun pa kaun manega

utar raha hai tu mujh mein kisi wahy ki tarah

wo tishna-lab hun ki patthar nichoD kar rakh dun

magar ye pyas to bahti nahin nadi ki tarah

main us ko dekhta rahta hun TikTiki bandhe

fasil ghumne lagti hai phir ghaDi ki tarah

zara si der ko ojhal agar wo hota hai

andhera phailne lagta hai raushni ki tarah