shuur-e-KHas ata kar diya gaya hai mujhe

shu.ūr-e-ḳhās atā kar diyā gayā hai mujhe

tabhī to sab se judā kar diyā gayā hai mujhe

maiñ bandagī ke bhī me.aar se girā huā huuñ

ḳhudā kī ḳhair ḳhudā kar diyā gayā hai mujhe

maiñ ishq 'ain-tasavvuf kī rū se jaa.ez huuñ

burā nahīñ huuñ burā kar diyā gayā hai mujhe

ye ġhaflateñ to mire ḳhvāb se bhī Dartī haiñ

mirā zamīr jagā kar diyā gayā hai mujhe

vo mujh se pūchh rahe the mirī koī ḳhvāhish

mujhe lagā ki rihā kar diyā gayā hai mujhe

use to ab bhī talab sī lagī huī hai koī

maiñ qarz thā so adā kar diyā gayā hai mujhe

taḌap rahī hai mirī ruuh tak abhī 'shāhid'

ye zahr kuchh to milā kar diyā gayā hai mujhe

shuur-e-KHas ata kar diya gaya hai mujhe

tabhi to sab se juda kar diya gaya hai mujhe

main bandagi ke bhi mear se gira hua hun

KHuda ki KHair KHuda kar diya gaya hai mujhe

main ishq 'ain-tasawwuf ki ru se jaez hun

bura nahin hun bura kar diya gaya hai mujhe

ye ghaflaten to mere KHwab se bhi Darti hain

mera zamir jaga kar diya gaya hai mujhe

wo mujh se puchh rahe the meri koi KHwahish

mujhe laga ki riha kar diya gaya hai mujhe

use to ab bhi talab si lagi hui hai koi

main qarz tha so ada kar diya gaya hai mujhe

taDap rahi hai meri ruh tak abhi 'shahid'

ye zahr kuchh to mila kar diya gaya hai mujhe