shuur-e-zat ka sauda kahin saron mein na tha

shu.ūr-e-zāt kā saudā kahīñ saroñ meñ na thā

ki ab shumār kisī kā payambaroñ meñ na thā

kisī ke lab pe shikāyat na thī añdhere kī

koī charāġh bhī jaltā huā gharoñ meñ na thā

jo pattharoñ pe bhī so jaatā thā sukūn kī niiñd

ab us ko chain kahīñ narm bistaroñ meñ na thā

pighalne kī vo rivāyat to mom meñ bhī na thī

vo saḳht-pan bhī kahīñ aaj pattharoñ meñ na thā

abhī abhī hī maiñ jis din se mil ke aayā huuñ

vo din to saal ke saare calenderoñ meñ na thā

na koī naqsh hī duniyā meñ mil sakā terā

tirā pata kahīñ lāshoñ ke pinjroñ meñ na thā

bahut dinoñ se haiñ jhīleñ bhī pur-sukūn 'salīm'

vo iztirāb bhī ab to samundaroñ meñ na thā

shuur-e-zat ka sauda kahin saron mein na tha

ki ab shumar kisi ka payambaron mein na tha

kisi ke lab pe shikayat na thi andhere ki

koi charagh bhi jalta hua gharon mein na tha

jo pattharon pe bhi so jata tha sukun ki nind

ab us ko chain kahin narm bistaron mein na tha

pighalne ki wo riwayat to mom mein bhi na thi

wo saKHt-pan bhi kahin aaj pattharon mein na tha

abhi abhi hi main jis din se mil ke aaya hun

wo din to sal ke sare calenderon mein na tha

na koi naqsh hi duniya mein mil saka tera

tera pata kahin lashon ke pinjron mein na tha

bahut dinon se hain jhilen bhi pur-sukun 'salim'

wo iztirab bhi ab to samundaron mein na tha