shuur-e-zat thoDa sa dil-e-nadan mein rakhte hain

shu.ūr-e-zāt thoḌā sā dil-e-nādāñ meñ rakhte haiñ

jamāl-e-āgahī jahl-e-ḳhirad-afshāñ meñ rakhte haiñ

chaman kaisā bayābāñ kyā simaT aa.egī ye duniyā

junūñ ke dam se itnī vus.ateñ dāmāñ meñ rakhte haiñ

nazar ke sāmne rahtā hai aks-e-gardish-e-daurāñ

ham ā.īna ko dil ke rauzan-e-zindāñ meñ rakhte haiñ

hujūm-e-ġham meñ yādoñ ke nihāñ-ḳhāne mahak uTThe

shagūfe lāla-zāroñ ke dil-e-vīrāñ meñ rakhte haiñ

hamāre soz-e-dil se nuur barsātī haiñ vo āñkheñ

ham apnī sham.a tāq-e-abru-e-jānāñ meñ rakhte haiñ

hamārī har nazar un kī nazar meñ Duub jaatī hai

ham apnā tiir un ke tiir ke paikāñ meñ rakhte haiñ

koī dastak koī aahaT koī jhoñkā koī ḳhushbū

'farīdī' dil ko bas zinda isī armāñ meñ rakhte haiñ

shuur-e-zat thoDa sa dil-e-nadan mein rakhte hain

jamal-e-agahi jahl-e-KHirad-afshan mein rakhte hain

chaman kaisa bayaban kya simaT aaegi ye duniya

junun ke dam se itni wusaten daman mein rakhte hain

nazar ke samne rahta hai aks-e-gardish-e-dauran

hum aaina ko dil ke rauzan-e-zindan mein rakhte hain

hujum-e-gham mein yaadon ke nihan-KHane mahak uTThe

shagufe lala-zaron ke dil-e-viran mein rakhte hain

hamare soz-e-dil se nur barsati hain wo aankhen

hum apni shama taq-e-abru-e-jaanan mein rakhte hain

hamari har nazar un ki nazar mein Dub jati hai

hum apna tir un ke tir ke paikan mein rakhte hain

koi dastak koi aahaT koi jhonka koi KHushbu

'faridi' dil ko bas zinda isi arman mein rakhte hain