shuur-o-fikr ki gahraiyon se haar gaya

shu.ūr-o-fikr kī gahrā.iyoñ se haar gayā

maiñ vo badan huuñ jo parchhā.iyoñ se haar gayā

jise tamām zamāna na kar sakā qaa.il

vo ḳhud zamīr kī sachchā.iyoñ se haar gayā

mirī jaḌoñ ko chalā hai vo khokhlā karne

zamāna jab mirī ūñchā.iyoñ se haar gayā

maiñ dushmanoñ se bhī nazreñ milā nahīñ saktā

mirā ḳhulūs mire bhā.iyoñ se haar gayā

maiñ terī mez pe rakkhā huā ik ā.īna

hazār tarah kī bīnā.iyoñ se haar gayā

nasīb tab kahīñ tanhā.iyāñ huiiñ 'kaifī'

ye dil jab anjuman-ārā.iyoñ se haar gayā

shuur-o-fikr ki gahraiyon se haar gaya

main wo badan hun jo parchhaiyon se haar gaya

jise tamam zamana na kar saka qail

wo KHud zamir ki sachchaiyon se haar gaya

meri jaDon ko chala hai wo khokhla karne

zamana jab meri unchaiyon se haar gaya

main dushmanon se bhi nazren mila nahin sakta

mera KHulus mere bhaiyon se haar gaya

main teri mez pe rakkha hua ek aaina

hazar tarah ki binaiyon se haar gaya

nasib tab kahin tanhaiyan huin 'kaifi'

ye dil jab anjuman-araiyon se haar gaya