shuur-o-fikr ki tajdid ka guman to hua

shu.ūr-o-fikr kī tajdīd kā gumāñ to huā

chalo ki fan kā ufuq kisht-e-za.afrāñ to huā

balā se le uḌī mujh ko shuā-e-nūr-e-sahar

fasīl-e-shab se guzar kar maiñ be-karāñ to huā

ye kam nahīñ hai ki maiñ huuñ ḳhalāoñ kā hamrāz

mire vajūd meñ gum saarā āsmāñ to huā

ye Thiik hai ki fanā ho gayā vajūd us kā

magar vo qatra samundar kā rāz-dāñ to huā

tamām harf-o-navā meñ simaT gayā lekin

hamārā ġham bhī bikhar kar ġham-e-jahāñ to huā

junūn-e-shauq to maslūb ho gayā lekin

har ek lamha mah-o-sāl par garāñ to huā

hamāre saath hī bikhrā hamārī zaat kā karb

ye raaz lafzoñ ke ambār se ayaañ to huā

maiñ un ke sāmne ā.īna ban gayā 'farhat'

ḳhud apnī shakl pe un ko mirā gumāñ to huā

shuur-o-fikr ki tajdid ka guman to hua

chalo ki fan ka ufuq kisht-e-zafran to hua

bala se le uDi mujh ko shua-e-nur-e-sahar

fasil-e-shab se guzar kar main be-karan to hua

ye kam nahin hai ki main hun KHalaon ka hamraaz

mere wajud mein gum sara aasman to hua

ye Thik hai ki fana ho gaya wajud us ka

magar wo qatra samundar ka raaz-dan to hua

tamam harf-o-nawa mein simaT gaya lekin

hamara gham bhi bikhar kar gham-e-jahan to hua

junun-e-shauq to maslub ho gaya lekin

har ek lamha mah-o-sal par garan to hua

hamare sath hi bikhra hamari zat ka karb

ye raaz lafzon ke ambar se ayan to hua

main un ke samne aaina ban gaya 'farhat'

KHud apni shakl pe un ko mera guman to hua