shuur tak abhi unki kahan rasai hai

shu.ūr tak abhī un kī kahāñ rasā.ī hai

abhī to kitne ḳhudāoñ kī vaañ ḳhudā.ī hai

gumān-e-tīrgī raḳhshandagī pe hone lagā

dayār-e-shab ne ajab dāstāñ sunā.ī hai

ab is pe duur nikal aa.e to ḳhafā kyuuñ ho

ye raah bhī to tumhī ne hameñ dikhā.ī hai

kabhī jo mujh se mile vo rahe ḳhamosh magar

pas-e-sukūt-e-zabāñ ḳhuub ham-navā.ī hai

har ek fikr kī tah meñ ho jazba-e-ḳhālis

bahut hī saḳht taqāzā-e-pārsā.ī hai

bahut hī ḳhuub ki dariyā ke paas rahte ho

kaho ki pyaas bhī apnī kabhī bujhā.ī hai

jo ḳhud hī jāda-o-manzil se nā-balad hai 'obaid'

ajiib baat yahāñ us kī rahnumā.ī hai

shuur tak abhi un ki kahan rasai hai

abhi to kitne KHudaon ki wan KHudai hai

guman-e-tirgi raKHshandagi pe hone laga

dayar-e-shab ne ajab dastan sunai hai

ab is pe dur nikal aae to KHafa kyun ho

ye rah bhi to tumhi ne hamein dikhai hai

kabhi jo mujh se mile wo rahe KHamosh magar

pas-e-sukut-e-zaban KHub ham-nawai hai

har ek fikr ki tah mein ho jazba-e-KHalis

bahut hi saKHt taqaza-e-parsai hai

bahut hi KHub ki dariya ke pas rahte ho

kaho ki pyas bhi apni kabhi bujhai hai

jo KHud hi jada-o-manzil se na-balad hai 'obaid'

ajib baat yahan us ki rahnumai hai