sifarishon ke bajae hunar se jaana gaya

sifārishoñ ke bajā.e hunar se jaanā gayā

parinda peḌ nahīñ bāl-o-par se jaanā gayā

kisī kā honā kisī kī nazar se jaanā gayā

mirā makān tirī rahguzar se jaanā gayā

mujhe milāyā thā ik roz tum ne miTTī meñ

natīja ye huā maiñ phir shajar se jaanā gayā

jahāñ pe bolte rahnā dalīl ilm kī thī

vahāñ maiñ guftugū-e-muḳhtasar se jaanā gayā

maiñ is kitāb ke ik baab kā huuñ ik kirdār

vo jis kitāb ko keval cover se jaanā gayā

vagarna ishq kī galiyāñ tavīl hotī haiñ

mirā nasīb maiñ pahle hī ghar se jaanā gayā

adab meñ 'mīr' kā qashqa hī thoḌī hai mash.hūr

hamārā sar bhī tirī ḳhāk-e-dar se jaanā gayā

maiñ tanhā kartā rahā muddatoñ ġhazal kā safar

aur āḳhirash ye safar ham-safar se jaanā gayā

sifarishon ke bajae hunar se jaana gaya

parinda peD nahin baal-o-par se jaana gaya

kisi ka hona kisi ki nazar se jaana gaya

mera makan teri rahguzar se jaana gaya

mujhe milaya tha ek roz tum ne miTTi mein

natija ye hua main phir shajar se jaana gaya

jahan pe bolte rahna dalil ilm ki thi

wahan main guftugu-e-muKHtasar se jaana gaya

main is kitab ke ek bab ka hun ek kirdar

wo jis kitab ko kewal cower se jaana gaya

wagarna ishq ki galiyan tawil hoti hain

mera nasib main pahle hi ghar se jaana gaya

adab mein 'mir' ka qashqa hi thoDi hai mashhur

hamara sar bhi teri KHak-e-dar se jaana gaya

main tanha karta raha muddaton ghazal ka safar

aur aaKHirash ye safar ham-safar se jaana gaya