sina hai ek yas ka sahra liye hue

siina hai ek yaas kā sahrā liye hue

dil rañg-e-gulsitān-e-tamannā liye hue

hai aah dard-o-soz kī duniyā liye hue

tūfān-e-ashk-e-ḳhūn hai girya liye hue

ik kushta-e-firaq kī turbat pe nauhagar

dāġh-e-jigar meñ sham-e-tamannā liye hue

maiñ ik taraf huuñ shakl-e-ḳhizāñ pā.emāl-e-yās

ik samt vo bahār kā jalva liye hue

jaanā sambhal ke ai dil-e-betāb bazm meñ

hai chashm-e-nāz mahshar-e-ġham-zā liye hue

sozāñ na ye chaman ho mire nūr-e-āh se

o gulshan-e-jamāl kā jalva liye hue

majnūñ se to haqīqat-e-sahrā-e-najd pūchh

hai zarra zarra jalva-e-lailā liye hue

ishq-e-junūñ-navāz rahā bazm-e-nāz meñ

ik iztirāb-o-shauq kī duniyā liye hue

merī to har nigāh hai vaqf-e-ubūdiyat

vo har adā meñ husn-e-kalīsā liye hue

marham se be-niyāz hai 'pinhāñ' ye zaḳhm-e-dil

kyā kyā fusūñ hai chashm-e-dil-ārā liye hue

sina hai ek yas ka sahra liye hue

dil rang-e-gulsitan-e-tamanna liye hue

hai aah dard-o-soz ki duniya liye hue

tufan-e-ashk-e-KHun hai girya liye hue

ek kushta-e-firaq ki turbat pe nauhagar

dagh-e-jigar mein sham-e-tamanna liye hue

main ek taraf hun shakl-e-KHizan paemal-e-yas

ek samt wo bahaar ka jalwa liye hue

jaana sambhal ke ai dil-e-betab bazm mein

hai chashm-e-naz mahshar-e-gham-za liye hue

sozan na ye chaman ho mere nur-e-ah se

o gulshan-e-jamal ka jalwa liye hue

majnun se to haqiqat-e-sahra-e-najd puchh

hai zarra zarra jalwa-e-laila liye hue

ishq-e-junun-nawaz raha bazm-e-naz mein

ek iztirab-o-shauq ki duniya liye hue

meri to har nigah hai waqf-e-ubudiyat

wo har ada mein husn-e-kalisa liye hue

marham se be-niyaz hai 'pinhan' ye zaKHm-e-dil

kya kya fusun hai chashm-e-dil-ara liye hue