sine mein uske ek dil-e-dard-ashna to hai

siine meñ us ke ik dil-e-dard-āshnā to hai

vo falsafī nahīñ hai magar sochtā to hai

taaza havā se kah do chalī aa.e be-ḳhatar

dar band hai zarūr darīcha khulā to hai

qismat pe naaz kyoñ na karūñ muddatoñ ke baa'd

tum sā rah-e-hayāt meñ sāthī milā to hai

ḳhvāboñ kī narm sej pe so.e na ham kabhī

manzil kī justujū meñ pasīna bahā to hai

be-nūr sā ik aa.ina mere makān kā

har aib har hunar mirā pahchāntā to hai

ahl-e-qalam na māneñge lagtā hai merī baat

allāh kī kitāb meñ sab kuchh likhā to hai

dil bāġh-bāġh kyoñ na ho ye soch kar 'shafaq'

shahr-e-ġhazal meñ koī mirā ham-navā to hai

sine mein us ke ek dil-e-dard-ashna to hai

wo falsafi nahin hai magar sochta to hai

taza hawa se kah do chali aae be-KHatar

dar band hai zarur daricha khula to hai

qismat pe naz kyon na karun muddaton ke ba'd

tum sa rah-e-hayat mein sathi mila to hai

KHwabon ki narm sej pe soe na hum kabhi

manzil ki justuju mein pasina baha to hai

be-nur sa ek aaina mere makan ka

har aib har hunar mera pahchanta to hai

ahl-e-qalam na manenge lagta hai meri baat

allah ki kitab mein sab kuchh likha to hai

dil bagh-bagh kyon na ho ye soch kar 'shafaq'

shahr-e-ghazal mein koi mera ham-nawa to hai